PERIUSISSAT/SULIARISASSAT UKIUMOORTUMIK PILERSAARUSIORLUGIT ISUMASIOQATIGIINNEQ

Ingerlatsivittut aappaagussamut angorusutatut siunniussat suliariniakkallu ataatsimut isigalugit, Visit Greenlandip allaffeqarfia ulluinnarnilu isumagisassaaluit qimallugit, ukiut tamaasa oqallisigineqartarput. Ukioq manna periusissanik pilersaarusiorneq 25-27 oktobari Nuummi ingerlanneqarpoq, anguniakkallu ilaannut atatillugu ullumikkumut naleqqussaanerit sivisunerusumik sammineqartut tamanut siammaakkusuppagut.

 

VESTNORDEN TRAVEL MART 2017

Ulloq inniminneruk! Vestnorden Travel Mart 2017'imi septembarip 18'ianniit 20'ianut Nuummi ingerlanneqassaaq, tassanilu inuit immikkut piumasaat nunallu immikkoortortaani tallimani pissutsit immikkuullarissut, kiisalu Nunatta Pioneering Nationitut nittarsaanneqarnerata ikorfartorneqarnissaa immikkut sammineqarnerussallutik.

 

Nittarsaaqatigiittarnermut taassumunnga ukiut sisamakkaarlugit Kalaallit Nunaat aaqqissuisuunissaminut periarfissaqartarpoq, tamatumanilu nunani tamani attaveqaqatigut peqatigalugit tamatta neqeroorutigisinnaasagut pillugit, kiisalu sullissisartunut atatillugu ineriartortitsinerit toqqaannartumik siammaassinnaasarlutigit. Vest Norden Travel Mart aqqutigalugu takornariaqarnikkut periarfissatsialaatigut pillugit katerisimaarnitsinni immikkut ittumik nittarsaaqatigiinnissatsinnut periarfissaqartarluta.

 

Visit Greenlandip Z Meetings peqatigalugu saqqummersitsinissaq taanna ataqatigiissarlugu aallartereerpoq. Nittartagaq tamanut ammasoq Vest Norden Travel Mart 2017 pillugu annertunerusumik paasissutissiissutiviusoq qaammatini tulliuttuni alakkartarniariuk.

 

VISIT GREENLANDIP ILISARNAATITUT NITTARSARNERATA TAKUJUMINARNERA

Ingerlatsivitta nittarsaanneranut atatillugu paatsuungasoqarsinnaasarnera arlalinnit tusartarparput, tassami ingerlatsivik ataatsimik taaguuteqariarluni Instagramimi allamik taaguuteqarluni (@ilovegreenland) aamma Facebook'imi allatut taaguuteqarmat (I Love Greenland - The Travel Community of Greenland.com), paatsuungasoqaqqunagu nittarsaavitsinni tamani ataasiinnarmik taaguuteqalernissarput aalajangerparput, tamani taaguutigalugu: Visit Greenland.

 

Taamaammat takornariaqarneq pillugu nittartagaq tamanut ammasoq tassaalissaaq visitgreenland.com greenland.com atorneqarunnaarluni, internetikkullu naapittarfinni allani  taaguutigineqalissalluni “Visit Greenland”. Allannguutit atorneqalerpata paasissutissat nutarterneqassapput.

 

GREENLAND FOR YOU: NUTAAMIK SAQQUMMIUSSISARFISSAQ

“Greenland For You” tassaavoq siunissami Visit Greenlandip ataani oqaluttuassartanik saqqummiisarfittut ilusilersorneqartussaq.

 

Atuagassiat soqutiginarsorisagut tamanut tulluussakkatut nassiussortarunnaarlugit, imarisaat immikkoortiterlugit ataavartussatut immikkoortiterlugit suliagut malittarinnitsitsinnut paasissutissiissutigisassavagut. Taamaammat inuit ilaannut nassiussukkat imaat allanut sanilliullugit allarluinnarnik imaqartassapput. Tamatuma kinguneranik inuit sutigut takornarianik sullissisarneri naapertorlugit namminneq immikkut soqutigisaat aallaavigalugit paasissutissat immikkoortiterlugit nassiussorneqartassapput. 

 

Maannakkut atuagassiarisartakkatsinnut B2C-mut isertartut misissoqqissaarnerisigut takusinnaavarput, mailimi allaaserineqartut siulliit tulliuttunut sanilliullugit iserfigineqakulanerujussuusut. Taamaammat allaaserisat naatsut paasiuminartullu ataasiakkaarlugit taamaallaat nassiuttassavagut. 

 

Inuit assigiinngitsut pisisarneranni pissutsit aallaavigalugit naleqquttunik paasissutissittarnerisa pingaaruteqarnera ersarissarniarlugu, Jack Wolfskinip misissuinera aallaavigalugu Tysklandimi TV'kkut Jack Wolfskinip ussassaarusiai marluk, pisisartunut assigiinngitsunut marlunnut sammisut takutinneqarput.

 

TAKORNARIAQARNEQ PILLUGU NITTARTAGAQ NUTAAMIK ISIKKOQALERPOQ

Aaqqissuussamut tunngasut soqutiginanngitsut mikisualuit ilanngutinngikkaluarlugit oqaatigissavarput, ukiumi nutaami nittartagaq greenland.com nutarterneqassasoq.

 

Tamanna qanoq sunniuteqassava? Nittartagaq nutaamik isikkoqalissaaq aamma atuisartut sunik misissuinerat naapertorlugu paasissutissat soqutiginartinnerusaasa nassaariuminarnerulernerisigut atoruminarnerulissalluni. Atuisartut soqutiginartillugit piffissaqartitaat eqqarsaatigalugit, alutorineqartut allanngorartuartut malittaralugit naatsukullammik atuagassiarisassavagut.

 

Suleqatigisavut Nunatsinneersut nunanillu allaneersut nittartakkami ussassaarinissaminnut periarfissarissaarnerulissapput kiisalu tamakkua nittartagaannut atuisartut nuullutik pisinissaminnut periarfississinnaanerat oqilisarneqassalluni.

 

ILAQUTARIIT TUSAGASSIORTULLU ANGALATINNERI AAQQISSUUTERIIKKAT

Visit Greenlandip Air Greenland kiisalu Air Iceland peqatigalugit, nunanut assigiinngitsunut takornariat angalanissaannik aaqqissuussisartut tusagassiortullu nunanit tamaneersut toqqartukkat angalanissaat, ukiut tamaasa aningaasaliiffigisarpaat.

 

Aningaasaliiffigineqarlutik angalasartut tamaasa immikkut siornatigut aaqqissuuttaraluarpagut, ukiorli manna sammisassat, angalanissat angalanissamullu ulluliussat aalajangerneqareerput, pilersaarusiorlugillu aaqqissuunneqareersut akorngini inissaqarneri apeqqutaatillugit angalatinneqassallutik. Nunap immikkoortortaani inerisaasut anguniagaat naapertorlugit, ilaqutariit tusagassiortullu angalanissaat pilersaarusiorneqartassapput, soorngunami pisariaqaraangat allannguisoqarsinnaasassalluni.

 

Nunap immikkoortortaani najukkanni, ilaqutariit imaluunniit tusagassiortut angalanissaat takorloorsinnaalereerukku, Lykke Geisler Yakaboylu uani attaveqarfigeqqullugu qinnuigissavatsigit; lykke@greenland.com.