ATTA, NATA, Vakinn aamma Keilir suleqatigalugit misigisassarsiorluni takornariartarneq pillugu Adventure Workshop

Islandimi Takornariaqarnermut Siunnersuisoqatigiit ATTA, NATA, Vakinn aamma Keilir suleqatigalugit misigisassarsiorluni takornariartarneq pillugu siuttuuvoq, tassani Islandi, Savalimmiut aamma Kalaallit Nunaat qaaqqusaallutik.

Islandimit aamma Kalaallit Nunaannit misigisassarsiortitsillutik takornariartitsisartut 30-t missaaniittut peqataapput, misigisassarsiortitsisarnermi unammilligassat periarfissallu pillugit ulluni marluni pissanganartumik oqallinninnerni peqataasut.

“Adventure Community Builder”

ATTA-p Moe Carrick Atlantikup Avannaani misigisassarsiortitsilluni takornariartitsisarnermi takorluukkat, iluatsitsinnissami unammilligassat iluatitsinissamullu periusissiat pillugit isumassarsiat paarlaasseqatigiissutigineqarnissaat siunertaralugu qulequtalimmik “Adventure Community Builder” ullormi siullermi ingerlatsivoq.

Peqataasut ilaatigut sisamanngorlugit avinneqarput, taakku tamarmik qulequtaq tunngavigalugu isumassarsiorlutik. Sammineqartut tassaapput: Strengths, Threats, Opportunities, Problems. Tamassumalu kingorna “Our Wildest Dreams” peqataasut nassuiaasersorlugit.

Nunani taakkunani marlunni assigiinnik unammilligassarpassuaqarpoq, soorunalimi aamma assigiinngissuteqarlutik. Assersuutigalugu Islandimi takornarissat Kalaallit Nunaannit amerlanerupput. Misigisassarsiorlutik takornarissat pinngortitami kisimiinnissaminnik ilimasuuteqartarput, kisiannili piviusuni soqutigisaqartut arlat ilagalugit busseqarpoq ulikkaarlutik takornarisassanik ilaasoqartartunik – misigisaqarnissamut ajoqutaavoq naggataatigullu misigisassarsiortitsilluni takornariartitsisarnermut ajoqusiissalluni.

Sammineqartut tassaapput: Strengths, Threats, Opportunities, Problems.

”Islandimi ingerlatsisut misilittagaat ilinniarfigisinnaavagut.."

Misigisassarsiorlutik takornarissat sammillugit

Isumaqatigiissutigineqarpoq nunani taakkunani marlunni takornariartitsisarneq imminut nappassinnaasumik akisussaassuseqartumilu ineriartortinneqassasoq, taamaalilluni misigisassarsiortitsilluni takornariartitsisarnermi nunarsuarmi tamarmi immikkoortuni sukkanerpaamik annertusiartorfiusumi nunarsuup immikkoortuani tassani amerlanerusunik misigisassarsiorlutik takornariaqalerniassammat.

Camilla Siezing Go Greenland-imeersoq oqarpoq: ”Islandimi ingerlatsisut misilittagaat ilinniarfigisinnaavagut. Tupaallaatigaara tusarakku Islandimi amerlasoorsuarnik takornariaqarlernissaanik ernumallutik maannakkut oqaluttoqarmat – taamatut ilisimasaqarnitsigut Kalaallit Nunaanni tamassuminnga aqutsinissaq angumerisinnaavarput. Aamma Kalaallit Nunaanni misigisassarsiortitsilluni takornariartitsinissap sammineqarnissaanut erseqqarissumik takorluugaqarnerput pillugu islandimiunit nersualaarneqarnerput pitsaasuuvoq.”

Ajutoorfiusinnaasunik nalilersuineq aamma sullissusitit pillugit sillimaniarneq

Ullut aappaanni sammineqartoq tassaavoq “Safety Management” Jean Claude Razel saqqummiisoralugu. Tassani ”risk assessment” qanoq suliarineqarsinnaaneranik oqaluttuaaqqat peqataasut misissorpaat. Suleqatigiit aappaanni pillugit ajutoorfiusinnaasunik nalilersuineq aamma Kalaallit Nunaanni sullississutini marlunni sillimaniarneq suliarineqarput: ”Ilulissat eqqaani qajartorneq” aamma ”Sail, Hike & Gold”, angalaneq ABC Chaterimit neqeroorutigineqartoq.

“Kalaallit Nunaanni sullississutit pitsaassuseqarnissaasa qulakkeerneqarnissaa amigaatigeqaarput. Tikeraartutsinnut paasiuminartunik pitsaassusiliinissaq sillimaniarnerlu pillugu assigiinnik piumasaqaateqartoqarnissaa pingaartuuvoq. Ingerlatsisut pappiaqqami assigiinnik sullississuteqarput, tikeraartullu taakku akii pinngikkaanni nalilersuinissamut periarfissaqanngillat – taamaammat Kalaallit Nunaanni nakkutilliinissaq pitsaassusiliinissarlu pingaartuupput”, Erik Palo ABC Charterimeersoq oqarpoq.

“Kalaallit Nunaanni sullississutit pitsaassuseqarnissaasa qulakkeerneqarnissaa amigaatigeqaarput."

Workshoppi nunat taakku pingasut akornanni suleqatigiinnerup nutaap aallartissutigiinnarpa.

Suleqatigiinnerup nutaap aallartinnera

Aaqqissuisut peqataasullu tamarmik isumaqatigiipput misigisassarsiortitsilluni takorneriaqarnerup imminut nappassinnaasumik ineriartortinnissaa, sillimaniarnermi periutsit atuutilersinnissaat qaffasissumillu pitsaassuseqartitsinissap qulakkeernissaa sammillugit workshoppi nunat taakku pingasut akornanni suleqatigiinnerup nutaap aallartissutigiinnaraa. Minngerunngitsumillu oqallittarfeqarlernera, tassani misilittakkanik paallaasseqatigiittoqartassalluni, imminullu nappassinnaasumik akisussaassuseqartumillu siuariartortoqarnissaa qulakkeerneqassalluni.

Kasper Trojlsgaard, Arctic Friend oqarpoq: “Naleqaqaaq. Sinaakkusiinissap sumullu ingerlaniarnitta oqaasertalerneqarnerat pitsaasuuvoq – ataatsimillu oqallittarfeqarneq pitsaasuuvoq, tassani misigisassarsiortitsisarneq ineriartortinneqarsinnaalluni pitsaassusilerneqarsinnaallunilu.”

Kalaallit Nunaanni peqataapput Destination Sagalands, Hotel Narsaq/Greenland Center, ABC Charter, Touring Greenland, Go Greenland, Arctic Friend aamma Visit Greenland.

 AdventureEDU aamma ATTA-mik suleqateqarneq pillugit paasisaqarnerorusukkuit attaveqarfigikkit, Lykke Yakaboylu, lykke@greenland.com, Mads Pihl pihl@greenland.com imaluunniit Anders la Cour Vahl, anders@greenland.com