2016-ip aasaanerani Campus Kujallermiit allatat imaattut atuarneqarsinnaapput: ”Ilinniagaq ilinnut takornarissanik qaqqani sivisujaamik angalaaqatigalugit suliaqarnissamik soqutiginnittumut, isumannaatsuunissaq, ilisimasat, ingerlatitseqqiineq, kiffartuussineq – pitsaasumillu misigisaqarneq – immikkut qitiutillugit.

Ilinniakkami makku ilaatigut ingerlanneqartarput: naasut uumasullu sammissavatit, avatangiisit ’sanarfineqarsimasut’, takornarissanik ilitsersueriaaseq, qaqqami ikiueqqaarneq (Wilderness First Responder), sermitakkut pisuttuarneq, tuluit oqaasii taavalu kulturinik paasinnittaatsit.

Ilinniartitsineq allanngorartumik holdikkaartunut atuartitsinertut, oqalugiartunik tusarnaarnertut, workshopsinik aamma sannavimmi sungiusarnertut ”on location” ingerlanneqassaaq. Ilinniartitsinerup ilaa 20 % missaaniittoq – Imarsiornermik Ilinniarfik suleqatigalugu – tassaassaaq Duelighedsbevisimut (inuussitissarsiutigalugu piginnaaneqarnermut uppernarsaammut) sungiusarneqarneq angallammik annerpaamik 12-nik ilaasoqarsinnaasumik ingerlatsisinnaalersitsisussaq.

 

Islandimisut

Ilinniarneq Islandimi ingerlanneqartoq malillugu, takornarialerisullu kalaallit assigiinngitsut oqaloqatigisarnerisigut inerisagaavoq. Ilinniagaq nutaaq Arktisk Guidetut ilinniakkamut 2013-imi aallartittumut saniatigut qinigassaavoq. Inunnut takornarissanik 8 tiiminik sivisunerusumik angalaniartunut ikiuerusuttunut siunnerfeqarpoq.

-Kalaallit Nunaata nunat assigiinngitsut akornanni misigisassarsiorluni orniffissamut piumasaqaatit tamaasa naammatsippai, Rie Oldenburg ilinniakkami siulersuisuusoq oqarpoq.

-Taamaammallu guidetut ilinniagaq aamma pisariaqartinneqarpoq, tassani immikkut qitiutinneqarlutik pinngortitami taavalu angalaarnerni isorartunerusuni ilitsersuineq.

Ilinniartitsinermut ilaapput naasut, uumasut geologiilu, adventure guidetut periaatsit, immakkut angallatinut 12-inut ilaasortaataasunut Duelighedsbevisi (inuussutissarsiutigalugu piginnaaneqarnermut uppernarsaat) taavalu ikiueqqaarneq nalinginnaasumik ikiueqqaarnermiit piginnaatitsinerusoq.

Ilinniakkami silami ingerlanneqartussat Ilulissani ingerlanneqassapput, kingornalu ilinniartut Qaqortumi Campus Kujallermut pissapput.

Holdit siulliit 24-nik nunamit tamarmeersunit ilinniartoqarput. Ilinniarneq ukiup affaanik sivisussusilik Ilulissani aallartippat – ilinniarneq Qaqortumi Campus Kujallermi decemberimi naammassineqartussaq.

Ilinniagaq pillugu annertunerusumik paasisaqarusukkaanni imaluunniit guideusinnaasumik attaveqarusukkuit uunga attaviginissinnavutit : Campus Kujalleq Rie Oldenburg, Uddannelsesleder Mail: ro@cak.gl