Google Street View – illoqarfinnik sumiiffinnillu assiliisaqattaariaaseq – ’trekker’-imik nassataqarlutik siorna Kalaallit Nunaanniissimapput.

Internettimi misissuisartut nunarsuarmi suminngaanneersulluunniit arlaqanngitsunik toortaalaaginnarnermikkut qarasaasiakkut Tasiusami angalaarsinnaapput, imaluunniit Nuummi, Tasiilami Kalaallit Nunaannilu sumiiffinni alutornartuni allani angalaarsinnaallutik. Tamakkualu tamarmik pisinnaapput Google atortorissaarutaallu ilisimaneqarluartoq Google Street View – illoqarfinnik sumiiffinnillu assiliisaqattaariaaseq – aqqutigalugit, taakkuami ’trekker’-imik nassataqarlutik siorna Kalaallit Nunaanniissimapput. Trekkeri tassaavoq assiliivik angallattagaq 15-inik assiliivittalik sammivinnillu tamanik assiliisinnaasoq.
 
Assilisat pilersinneqarsinnaanngorsimapput Asiap Visit Greenlandimik ataqatigiissaakkamik suleqateqarneratigut, aasap ingerlanerani illoqarfinnit nunaqarfinnillu tikeraakkanit kilometererpassuarni ingerlaarnermi assilisarpassuarnik katersisoqarsimammat, Googlellu assilisat qarasaasiakkut Google Street Viewimi ullumikkumiit tamanut isiginnaarneqarsinnaanngortippai.

Nunarsuaq tamakkerlugu aqquserngit assingi nuannarineqarluartut

Google Street View ukiualuit ingerlaneranni internettimi kiffartuussiviit nuannarineqarnerpaartaannut ilaalersimavoq. Google Street View atuisunut ataasiakkaanut misigisassatsialaavoq – soorlulusooq nammineq najuulluni – illut akornanni, akunnerpassuillu misissuataarinermut immikkuualuttortanillu nutaanik takusaqarniarnissamut atorneqarsinnaallutik. 



- Toortaanerit arlaqanngitsut atorlugit illoqarfik nunaqarfilluunniit tamakkerlugu erseqqissumik takussutissarsisoqartarpoq illullu kaffisoriarfissap qanoq isikkoqarnera paasineqarsinnaalersarluni, Asiameersoq Eva Mätzler assersuusiorluni oqarpoq.

- Googlemit nalunngilarput, ujaasinerit tallimaagaangata ujaasineq ataaseq atuisup sumiiffimmit nunap assinganik assilisanillu qimerluuineranik kinguneqartartoq, taamaattumillu Googlemik suleqateqarnissaq tulluartuusimalluni. Asiaq aamma Visit Greenland Kalaallit Nunaanni misissuiartorluni angalanissanik pilersaarutaasunik Street Viewimut atugassanik assiliiortornissamut atorluaasarsimapput, nangilluni oqarpoq.

Kalaallit Nunaat tamakkerluni Google Street Viewiilissava?

Naamik – Nuna angivallaarujussuarpoq, taamaattumik Googlep inoqarfiit sumiiffillu immikkut soqutiginaatillit siunnerfigai. Paasissutissat nammineq kajumissutsimik suliaqartunit allanilluunniit sumiiffiit nittarsaannissaannik soqutigisartunit katersorneqassapput.

Kalaallit Nunaanni sumiiffiit arlaqarnerusut ilanngunneqassappat?

Sumiiffiit nunaqarfittallit arlaqarnerusut ungasinngitsumi saqqummersinneqassapput. Asiap ilaatigut angalalluni misissuiartortarnermik ingerlatani suliniutitigut siunissami aningaasalersortittalissavai siornatigutut aningaasanut inatsimmi aningaasaliissutit aalajangersimasut aqqutigiunnaarlugit. Tamatuma saniatigut Googlep atortorissaarutini nunarsuarmi sumiiffinni allani atussavai, taamaattumik soqutiginninnerat paasissutissanik Kalaallit Nunaanneersunik naammattumik atuisoqarnersoq apeqqutaassaaq.

Kalaallit Nunaannut iluaqutaalluartussaq

Visit Greenlandip tungaanit suliniummi suleqatigiinneq tamanna, 2015-imi aamma illoqarfinnut nunaqarfinnullu arlaqarnerusunut assiliiartornikkut ingerlaqqittussatut naatsorsuutigineqartoq, suliffeqarfiup pisortaa Anders Stenbakken naapertorlugu, ’iluaqutaalluartussatut periarfissaasimavoq’.


- Suleqatigiinneq internettimik atuisunut, Kalaallit Nunaannut Googlemullu ataatsimut iluatsilluarsimavoq. Visit Greenlandip takornariat amerlanerit Kalaallit Nunaannik soqutiginnilersittussaavai, Googlelu internettimik atuisut amerlanerpaartaannut ujaasiffissatut ullumikkut pingaarnerpaammat, internettimi nunarput pillugu paasissutissanik atorsinnaasunik amerlanerpaanik nassaassaqarnissaa soorunami soqutigisariinnarparput, oqarpoq.


Google Maps nunarsuarmi eqqornerpaamik, atorluarneqarsinnaanerpaamik imaqarnerpaamillu nunap assinganik sananissani siunniuppaa, Street View-imillu ilallugu inunnut assitut takusassiaralugu paasissassarsiorfittut ingerlaarneq iluarusuutissatut sananaaneqarnera qitiulluinnarpoq.

Kalaallit Nunaat nunarsuarmiunit isigalugu pinngortitaq silallu pissusaata pingaaruteqarnera tunngavigalugu immikkut soqutiginaateqarpoq, taamaattumillu Google Kalaallit Nunaat pillugu paasissutissanik amerlanernik pissarsinissamut soqutigisaqarluarsimalluni, suliffeqarfinnit Namminersorlutik Oqartussanit pigineqartunit marluusunit naggasiutigalugu oqaatigineqarpoq.