PILERISAARALUNI IMMIUSSINEQ

2016-ip aasaanerani tyskit silami atisassiat meqqiata Jack Wolfskinip pilerisaarutit marluk tyskit fjernsyniinut saqqummersippaat Kalaallit Nunaanni Tunumukassagaanni atisaliai taamaattut avatangiisini taamaattuni atugassaqqissutut saqqummersillugit. Soorunami selskabi taanna atisanik tuniniaavoq Kalaallit Nunaat tuniniarnagu, taamaattorli misissuinerup matumap siunertai eqqarsaatigalugit takorloorparput isiginnaartartut sianiginngisaminnik qaatigooq kisiat pinnagu kisianni aamma sumiiffimmut tunngasunik paasissutissanik pissarsiaqartartut.

 

Jack Wolfskinip pilerisaarutit assigiinngilluinnartut marluk pinngortippai, tamarmik immikkut pigisaminnik misigititsisunik, tuniniaaffiullu immikkoortuinut assigiinngitsunut marlunnut saaffiginnittut.

 

Siullermik pilerisaarutit naatsut marluk linkit ataaniittut aqqutigalugit isiginnaaqqaalaariakkit assigiinngissusaallu malugisinnaanerlugit takullugu. Taava kingorna tuniniaaffiup immikkoortui assigiinngitsut pileritsatsinniarlugit tuniniagaq ataaseq (Tunu) pilerisaarutinit marlunnit periaatsit assigiinngitsut atorlugit ingerlateqqinneqarnersoq pillugu misissueqqissaarnerput naatsoq atuaruk.

 

KALAALLIT NUNAANNI TUNU PIKKUNARTUNIK MISIGISASSARSIORTUMUT

Pilerisaarut naatsoq siulleq isiginnaaruk here.

 

Pilerisaarut taanna Pikkunartunik Misigisassarsiortumut saaffiginnippoq, angalasartumut timimik annertuumik atuisarfissarsiortumut teknikikkullu piginnaasaqarluarnermik misilittagaqarnermillu piumasaqakkajuttarluni.

 

Nipilersuutaata nipitussusaa rytmialu aammalumi assit taama sukkatigisumik sarsuatinnerisa Pikkunartumik Misigisassarsiortumut nipaatsumillusooq nalunaarpaat Kalallit Nunaat inunnit taamaattunit orninneqanngitsuugassaanngitsoq. Nipilersuutip sakkortussusia sukkassusialu pikkunartumik timimik atuisimanermut eqqaanartitsipput, allaallumi soorlu tillerneq sukkatsingajattoq pilerisaarut isiginnaaginnarlugu. Aamma eqqaanngitsuugassaanngilaq sammisat pilerisaarummi takutinneqartut sakkortunerusumik misigisassarsiornerummata immiussanilu inuit ersittut ikittuaraannaallutik avinngarusimasumiinnermik misigititsillutik.

KALAALLIT NUNAATA TUNUA PINNGORTITAMIK NUANNARISALIMMUT

Pilerisaarutip naatsup tullia isiginnaaruk here.

 

Pilerisaarut taanna Pinngortitamik Nuannarisalimmut saaffiginnippoq, angalasartumut asimi avatangiisit takorannersut akornanniinnissamik nuannarisalimmut kisiannili tamakkiisumik paasisassarsiortunut peqataasariaqarnani iluarisami angunissaanut.

 

Aamma tassani nipilersuutaata nipitussusaa rytmialu, matumuuna sallaannerulluni tusarnaaruminarnerullunilu, Kalaallit Nunaata ornitassaaneranik nuannersoq misigisassarsiorfissaqqissorlu nalunaarutigineqarnerata ingerlateqqinneqarneranut pingaaruteqanngitsuunngilaq. Aamma inuttap pingaarnerup toqqaannartumik oqaluttuartinneqarnera misigisap inuppalaarnerusumut pisippaa, taamalu inuit amerlanerusut ilisarsisinnaalersillugit. Kiisalu, immiussat illoqarfimmik takutitsisut, angalasut arlaqartut peqatigiissut, aammalu umiatsiamik qimussimillu angalaartillutik najugaqarfimmiunik (qimminillu) arlaatigut susassareqatigiissut Kalaallit Nunaata nunap atortulersugaaneragut ima pitsaatigisoq inuit amerlanersaasa kissaataannut allaat naapertuulluni takutinnissaanut ilapittuutaavoq.

 

SUKKUNUKU TAMAKKU PINGAARUTEQARTUT?

Ornitassaq ataaseq pillugu marlunnik pilerisaarusiorneq pisarissersuutaannartut isikkoqarsinnaagaluarpoq kisianni eqqortoq unaavoq siunnerfigineqartut assigiinngitsut amerlasuut pileritsatsinniaraanni pisariaqarpoq. Inuit ilisarisinnaasaminnik tigusisuunissartik pisariaqartippaat – asseq filmiluunniit takusinnaasariaqarpaat imalu eqqarsalersinneqarlutik, ”Uanga tassani peqataasinnaavunga!”. Taamatut pisoqaraangat misigissutsikkut Kalaallit Nunaannut arlaatigut atassuteqalerneq pilersarpoq, taamalu takornariarumalerneq assut qaninnerulersinneqartarluni.

 

Pisinnaasoq ajornerpaaq immaqa tassaavoq arlaata takutitassiat pitsaasuunngitsut takuppagit, Kalaallit Nunaat eqqortuunngitsumik takorluulerlugu kingunerisaanillu siunissami takornariarfiusinnaanera isumaminiit mattullugu. Ima isumaliulersinnaapput ”Kalaallit Nunaat uannut tulluanngilaq; pikkunarpallaarpoq”. Taamaalissagaluarpat taava tassanngaannartumik suliaq allanngussaaq, periarfissanik nutaanik ammaassiniarnermiit takorluugaasa allanngortinniarnissaannut nuulluni – suliarlu taamaattoq assut oqimaassalluni.

 

IMARINEQARTUSSATUT NAMMINEQ TOQQAKKATIT SIUNNERFIGINEQARTUNUT TULLUARSAKKIT

Imarineqartussatut nammineq toqqakkatit siunnerfigineqartunut tulluarsalerusukkukkit imaluunniit siunnerfigineqartunut tulluarsaaneq ataatsimut isigalugu paasisaqarfiginerorusukkukku taava Sarah Woodall ugguuna attavigiuk sarah@greenland.com.