Takornarialerisut ilaannut ukioq ingerlalluarnerpaaffiuvoq, allallu nutaanik unammilligassaqalerlutik. Assiliisartunik takornariartitsineq, umiarsuit atorlugit takornariartitsineq, Air Icelandip sunniuteqarnera allallut pillugit uani atuakkit.


Tunu:

Ittoqqortoormiini  umiarsuarnik takornariat amerlipput qimusserniarlutillu takornariat amerlanerullutik.

Tasiilami takornariat suli amerliartorput, tamassumanilu Tasiilami ingerlatsisut sullississutiminnik ineriartortitsinissamik periarfissaqalerput, soorlu assiliiniartunik takornariartut amerlanerusunik suliassaqartitsilerput.

 

Kujataa:

Nanortalik: 2014 Nanortalimmut 2013-imut sanilliullugu annikinneruvoq, tamanna naammaginanngilaq. Aammattaaq erseqqissarneqassaaq umiarsuarnik takornariarlutik tikittut 2013-imut sanilliullugu annikinnerusumik isertitsiviusut.

Qaqortoq (Hotel): Piffissaq takornariaqarnerpaajuffik, juni aamma juli siornatigut naammaginarnikuusoq piffissami kingusinnerusumi ajunngitsorujussuarmik ingerlanikuuvoq. Imaanngilaq nutaanik angalatitsisartunik takkuttoqartoq, kisiannili angalatitsisartutoqqat nassiuttagaat amerlanerulersimapput.

Narsarsuaq: Taamaaginnarput, kisiannili Air Icelandip sap. akunneranut tikittarnini marlunnik ikilivai.


Qeqqata:

Kangerlussuaq: Taamaaginnarput, kisiannili amerlasuunik saaffiginnittoqaraluartoq, takornarissanik nassuiaassisartut amigaataanerat pissutigalugu taakku sullinneqarsinnaasimanngillat.


Sisimiut: (Sirius Greenland) 2014 aliikkutaralugu aalisartunik aalisartitsinermi ukioq pitsaasuuvoq. Umiarsuarnik takornarissat angallatinik angallassineq nalinginnaasumik annertungaatsiartumik tunisiffigisartagarput 2013-imut sanilliullugu affaannaanik tunisiffigaarput. 2014-imut ilisarnaataavoq sullissutigut pingaarnerit ingerlalluarfiunerat, aalisarneq annikitsumillu angallatinik angallassinerit hoteli angalatitsiviillu aqqutigalugit tunisiffigisartakkagut.

Sisimiut (Hotellet): Ataatsimut isigalugu 2013-isulli ingerlatsiviuvoq.

 

Qaasuitsup:

Ilulissat (Hotel Arctic): 2014 ulloq unnuarlu takornariartut amerlassusaannut naatsorsorlugit pitsaanerpaajuvoq, 2015-imullu ingasanngitsumik amerlinissaat ilimagaarput. Aammattaaq takornarissat unnuisartut ukiut tallimat 2011-2014 ingerlaneranni ulloq unnuarlu takornarissat 45 %-imik amerlanerulernikuupput.

Ilulissat (Tourist Nature): Uagutsinnut taamaaginnapajaarpoq, immaqa 2013-imu sanilliullugu inuit 2-miit 250-inut amerlanerusut.

Ilulissat (WOG): World of Greenlandimut aamma piffissaq takornariartitsivik ingerlalluarnikuuvoq, kaaviiaartitallu 15 %-imik qaffariarnikuullutik. Piffissami takornariaqarnerpaaffiusumi taamatut qaffariaateqartoqarpoq.

Ilulissat (Hotel Avannaa): 2014 2013-imut sanilliullugu 3-4 %-imik pitsaaneruvoq. Ataasiakkaarlutik angalasut amerleriarput ataatsikkullu angalasut ikileriarlutik. Islandi aqqutigalugu tikeraat Europallu avataaneersut pingaartumik Kangianiit amerleriarput, aammali Australiamiit assigiisaanniillu.

Nunatta Angalatitsivia: 2014 Nunatta Angalatitsivianut 2014 takornariartitsinermi pitsaasuunikuuvoq aammali niuernermi angalasut eqqarsaatigalugit pitsaasuunikuulluni. Niuerfinni taakkunani marlunni kaaviiaartitat qaffariarput. Takornariartitsinermi 2014-imi kaaviiaartitat 15 %-imik qaffariarput. Danmarkip avataani niuerfiit qaffariarfiunerupput aammalu upernaakkut ukiakkullu angalatitsinerit qaffariarfiullutik.