Piffissaq 6-11 April, Visit Greenlandip Air Iceland peqatigalugu internetikkut inuit naapittarfiinut sunniutillit pingasut kiisalu Amerikami angalatitsivimmik piginnittoq, joint press / FAM trip in the Ammassalik district-imik ingerlatsisoq qaaqqusaraat.

 

Angalasut avinngarusimasumi misigisassarsiorlutik Kulusuk tikiinnarlugu nanoq aatsaat pisarineqarsimasoq persuarsiutigineqartoq peqataaffigalugu alutorsarluavissorput. Taakkua aamma akunnerni arlalinni qimusserlutik Tiilerilaaq unnuiffigiartorpaat, Tiilerilaap inerisarnera Kommuneqarfik Sermersuup, Destination East Greenlandip, Visit Greenlandip kiisalu Tiilerilaami najugallit ataatsimoorlutik suliariniagaannut ilaammat.

 

Soorngunami sila pissanganartorsiortitsinngippat Tunumi misigisassarsiorneq immikkooruteqarnavianngikkaluarpoq. Tasiilami apinerujussua pissutigalugu ulluni marlunni sapernguvugut, angalanermilu tassani "qaqquaarimmi tammarneq" unammillernarnersaalluni.

 

MALUGINIAKKAT

Peqataasut suna alutorsaatiginerpaavaat?

  • Tiilerilaap misigisaqarfiginera, nalunagu ikittuinnaat taamatut periarfissaqartartut. Tiilerilaami najugallit ulluinnarni inooriaasaannut pulasinnaanertik assut nuannaarutigaat, sivisunerusumillu najorusukkaluarlugu.

 

  • "Inuit inussiarnersut pitsavinnik nerisassaqarluni sukisaarsaqatikkuminartut" Hotel The Red Housemi najugaqatigalugit nuannivippoq. Robert Peroni suleqataalu sullissilluaqaat.

 

  • Kalaallit Nunaanni takornarialerinerup suli sungiusimaneqannginnera Islandimiit assigiinngequtaavoq.

 

Peqataasut misigisatik nassuiarniarlugit oqaatsit atugaat maluginiariakkit.

 

SULI ILUARSIALLANNEQARSINNAAVOQ

Timmisartumik angalanissat kinguartoortaraluartut, peqataasut tamanna pillugu tunngavilersuillutik oqaaseqaataat ikittuinnaapput. Tunumi angalanerminni oqaatiginiagaat, Kalaallit Nunaanni sumiluunniit pisimasinnaagaluarput.

 

  • Peqataasut inuusuttuullutik peqqissuungaluarlutik, aputeqarnerata issinneratalu nukersortippaat. Ukiuunerani angalanerit tamarmik timersornartutut nalunaarsorneqartariaqaraluarput.

 

  • Nerisassat ilaat aatsaat misigisassarsiorusulluarluni ilaallu ammasumik inissisimagaanni nerisariaasarput. Puisi, arfeq imaluunniit nanoq ooqattaalaarlugit immaqa ajunngikkaluarpoq, ullormullu nerisassatut pingaarnertut sassaalliutigineqartartillugit allaavoq. Europamiut nerisassaataat taamaammat piareersimatittariqarput.

 

  • Tiilerilaamiit Tasiilamut uterlugulu aqqutaa takivallaarpoq assigiiaarpallaarlunilu. Periarfissaqaraangat assigiinngitsunik misigisaqartinniarlugit assigiinngitsunik assartuuteqarniartarisi.

 

KINGUNERI

Tusagassiuutitigut sunniuteqartartut pingasuinnaangaluarlutik, angalanitsinnit assinik 42´nik saqqummiisimapput katillugit 98.059´inik likerneqarsimasunik. Taakkua Instagrammikkut saqqummersitaat ataani takusinnaavatit (Kalaallit Nunaannut tunngasuunngitsoq ersissinnaavoq).

 

Angalanittali iluaqutissartai tamaanga killeqanngillat. Taakkua assilisatik ilaatigut Visit Greenlandimut atukkiussinnaavaat unalu photos.greenland.com aqqutigalugu assit ivertissukkat takuneqarsinnaallutik misigisaallu Greenland.com aqqutigalugu saqqummersinneqassallutik. Peqataasut ilaat arnaq aamma filmiliorpoq nammineq Bulgariamiutut oqaatsini atorlugit oqaasertalersorlugu. Taamatut ilanngussisinnaanera iluaqutaavoq, taassumammi Bulgariami saqqummiussinnaasai uagut akilersinnaanavianngikkaluaratsigit.


Angalatitsisarfimmik piginnittoq naammatunik misigisaqarpoq, angalaniartunullu Kalaallit Nunaannukarnissaat neqeroorutigiuassallugu ilimagaa, aasakkulli angalatitsisarnissaq eqqarsaartiginerullugu.

 

 

 

Instagramimi assit @patheight, Nikolaus Brinkmann: