Kalaallit Nunaannit avammut timmisartumut ilaasut nuna najugaat Visit Greenlandip Naatsorsueqqissaartarfik suleqatigalugu juli 2014 aallarnerfigalugu nalunaarsortalernikuuai, kisitsisillu tamarmik nittartakkami uani takuneqarsinnaapput www.tourismstat.gl.

Kisitsisit taakku pingaaruteqartut takutippaat, 2015-imi kvartalit pingajuanni sisamaannilu timmisartunut ilaallutik takornarissat 23,8%-imik amerleriartut. 2016-imi ukiup affaani siullermi kvartalit siullianni aappaannilu kisitsisit maannakkut takutippaat suli amerliartortut: 

755%-imik amerleriarput - ilumoorsinnaava!?

Timersornermik kulturimillu aaqqissuussinermi Arctic Winter Games-imi Kalaallit Nunaat 2016-imi aaqqissuisuuvoq, tassani tikeraat 1.700-t Nuummut martsip qaammataani tikipput. Aqqissuussineq taanna annertummat ataasiaannarlunilu ingerlanneqarmat 2016-imi takornarissat pillugit kisitsisit marlunngortippagut: Arctic Winter Games ilanngullugu ilanngunnagulu kisitsisit. Canadameersut USA-meersullu amerleriarujussuarnerannut Arctic Winter Games (AWG) pissutaavoq, tassani tikeraat amerlanersaat Amerikap avannaaneersuupput.

AWG-mi tikeraat 1.300-t missaaniittut Canadameersuupput, taakkulu 754,9%-imik amerleriarujussuartitsipput. AWG-mi kisitsisit ilanngaatigigaanni Canadameersut amerleriarnerat 90%-ip missaaniippoq. Taamatuttaaq USA-meersut, tassani AWG-mut tikeraat ilanngullugit 100%-iungajallutik, AWG-mullu tikeraat ilanngunnagit 45%-it missaaniillutik. Amerleriaatsilli suli annertupput.

Aasakkut-ukiakkut takorniariartarnerit nuannarineqarnerpaajupput

Tikeraat amerlanersaasa ukiup affaani kingullermi Kalaallit Nunaat tikittarpaat, tassani piffissaq takornariarfiunerpaajusartoq suli tassaalluni qaammatit julimiit septemberimut.

Diagrammimi qulaaniittumi ersarissumik takuneqarsinnaavoq 2015-imi ukiup affaani siullermi kingullermilu takornarissat qanoq agguataarsimanersut. Takornarissat tamarmiusut pingajorarterutaasa Kalaallit Nunaat qaammatini jannuarimiit juunimut tikittarpaat, pingasuugaangatalu marluk qaammatini juulimiit decembarimut tikittarlutik, aasaaneranili takornariaqarnerpaaffiusartumi juulimiit septembarimut amerlanerpaajullutik. Naak 2014-imi juuli sioqqullugu ukiuni siuliini taamatut pisoqarsimaneranik takutitsisinnaasunik timmisartunut ilaasut pillugit kisitsisaateqanngikkaluarluta, 2015-imi 2014-imilu unnuisartunik naatsorsueqqissaarinerit takugutsigit tamanna ilimanarpoq:

 

NB: Ajoraluartumik unnuisarfinnit 118-iusunit taamaallaat 47-t unnuisartut pillugit kisitsisinik nalunaaruteqarnikuugaluartut, allanngoriartortoqarneranik takutitsipput, tamakkiisuunatilli.

 

Piffissami takornariaqarnerpaaffiusumi kisitsisit pissangalluni utaqqineqarput

Takornarissat tamarmiusut affangajaat qaammatini juulimi, aggustimi septembarimilu nunarput tikeraartarmassuk, kvartalit pingajuanni kisitsisit avammut saqqummiunneqarpata 2016-imi amerliartornerat pillugu eqqortumik oktobarimi oqaaseqarsinnaavugut. Ukiulli affaani siullermi kisitsit inuussutissarsiortuniillu nalunaarutit tunngavigalugit ukiup affaata aappaani suli amerleriarnerusimanissaat ilimanartorujussuuvoq.

 

 

Islandimi pissutsit

Islandimi kisitsisit, Kalaallit Nunaanni amerleriaatinut pissutaaqataalluinnartoq, takutippaat 2016-imi qaammatini arfineq marlunni siullerni Keflavikimi mittarfik aqqutigalugu timmisartunut nunanit allaniit ilaasut amerlassusaat 34%-imik amerleriartut. Ukiup siuliani kisitsisit 28%-iusimapput. Islandimi Kalaallillu Nunaanni niuerfiit pingaarnerit (Skandinavia, Europap Avannaa Amerikalu Avannerleq) imminnut atasorujussuusut ersippoq, tassungalu peqatigalugu Islandimi takornariartitsisartut saniatigut sullississutiminni Kalaallit Nunaat tikeraarfissatut paasiartulernikuugaat tusarsaalerpoq. Islandimut/Kalaallit Nunaannut ataatsimoortillugit angalasarnerit amerliartornera ingerlaannassappat Kalaallit Nunaannut iluaqutaasorujussuussaaq.

 

Unnuisarfinni timmisartunilu inissat amerlanerpaaffissaat tikinneqangajalerpoq

Kalaallit Nunaanni takornariaqarnerup annertusiartornerata kinguneraa, timmisartuni inissat innuiffissallu imaqqortussusai ilungersunartorsiortut, tikeraarfissat ilaanni piffissami amerlanerpaanik takornariaqarfiusartumi unammillernarsinnaasoq. Tamanna tunngavigalugu 2016-imi ukiup affaani kingullermi ukiup siuliinitulli annertutigisumik amerleriaateqartoqarnissaa ilimagisinnaagunanngilarput.