‘Kalaallit Nunaannukarit eqqissisimaarlutillu!’

Kalaallit Nunaata eqqissisimaartilissavaatit unillutit inunnik aqqusinermi ilassinnittarlutit. Eqqarsartaaseq taanna pisuttuaraani, aalisaraanni, paarnartaraanni qimusseraanni tuaviuuteqarani inuuneruvoq, tamakkulu tamarmik Kalaallit Nunaata ’eqqissilluni takornariartarnerup’ ussassaarutissaqqissuuneranut tapersiipput.

Kigaallalaarluni inuunerup pingaaruteqassusia Kalaallit Nunaannukarnissamut pissutaasut ilagaat. Ilulissani januarmi Qaasuitsup Kommuniata aaqqissugaanik niuernernik ineriartortitsineq pillugu ataatsimeersuarnermi peqataasut isumaqatigiissutigaat.

Eqqarsartariaatsip taassuma nalitsinni piujartortut takutippaa: Eqqissilluni inuuneq tikiffissamut tikeraarnissamut pissutaalluartutut ussassaarutigineqaleriartorpoq. Tamassuma annertusiartornera Kalaallit Nunaanni takornariartitsinermik inuussutissarsiornermi qanoq atorluarneqarsinnaava?

”Suliffiga stressernartorujussuuvoq, taamaammat eqqissinissamut anersaartornissamullu feriara periarfissaavoq. Pisorpassuarniit tunuarnissara nuannarisarpara pinngortitamiillungalu. Avatangiisima akornusernissaat, ajoquserneqarnissaralu nuannarineq ajorpara”


- Inuilaarsuarmiikkumatooq

”Kulturimik piffissami sivikitsumi malugisaqartoqarsinnaavoq, kisiannili kulturi paasisaqarfigilluarusukkaanni ilinniarusukkaannilu piffissami sivisuumi tassaniittoqartariaqarpoq.”

- Ungasissumut angalasartoq

Eqqissilluni misigisassarsiornermi naleqassutsit

Taaguut ’eqqissilluni misigisassarsiorneq’ nunarpassuarni misissorneqarnikuuvoq, assersuutigalugu Skotlandimi, Norgemi Finlandimilu, tassa pingaartumik tikiffiit inuilaarsuullu imminnut erseqqarissumik atassuteqarfigisaanni. Ineriartortitsineq kingulleq taanna Dr. José-Carlos García-Rosellip Finlandimi takornariartitsisarnermik instituttimi assigiinngitsorpassuarnik sammisaqarfiusartumi oqalugiaataa malillugu eqqissilluni inuunermut, imminut nappassinnaassusermut iluarusunnermullu nunarsuarmi ingerlanneqariartortunut atassuteqarpoq.


Eqqissilluni misigisassarsiornermi tikiffissat imaluunniit annikitsuaqqanik sammisaqartitsinerit pinnagit angalaneq nammineq isiginiarneqartarpoq. Tamassuma skandinaviami silami inooriaatsip qitiunera takutippaa. Norgemiutut taaneqartarpoq ’silaannarmiinneq’, taguummi pifissap, uninngalertornerup, silaannarmiinnerup kiisalu sumiiffiup inummut timimullu sunniuteqarnera pingaartinneqarput.

Finlandimi Laplandimi maannakkut misigaat nunaqarfeeqqani ulluinnarni inuunermik tikeraat paasisaqarnissaannik neqeroorfigalugit nunaqarfeeqqat tikiffissatut qanoq soqutiginaateqartigisut. Nunaqarfik Salla assersuutissatsialaavoq, tassani oqaasinnaaq ’inuilaami’ aamma sullississutit soorlu ’sapaatip akunnera susoqarfiunngitsoq’ atorneqartarput, Garcia-Rosell oqarpoq. Malugiulli susoqartoqartannginneranik tamanna isumaqanngitsoq! Akerlianik Sallami nipiliortut akornusuineq ajorput, kisiannili ’nannup pisiminiittup qannguisup nipaanik imaluunniit qilammi arsarnernit’. Nipaassuseq, killingit, issittumi unnuat ulluinnarnilu inuuneq tikiffissat pilerinartut ineriartortinneranni pingaartuupput.

Sullississutinik ineriartortitsineq taanna Kalaallit Nunaanni takornariartitsisarnermik inuussutissarsiortut qanoq atorsinnaavaa?

Aamma misigisassarsiorlutik takornarissat immikkut ittut tikilluaqqunerat?


Takornarissanik adrenalineqartorujussuarnik misigisassarsiornissamik kissaateqanngitsunik kisiannili kulturi pinngortitarlu piffissamik atuiffissaqqissut ilanngullugit immikkut ittunik inuttullu misigisaqarnissamik kissaateqartunik Kalaallit Nunaanni takornariartitsisartut tikilluaqqusinissaannut tamanna periarfissaavoq.

Eqqaamaneqartariaqarpoq angalanermi ilorrisimaartitsinissap isiginiarneqarnissaa ilanngullugu takornarissat feriarnermi eqissillutik nutaanillu misigisaqarnissamik kissaateqartartut. Takornarissat assigiinngiiaartut Kalaallit Nunaanni takornarissanik immikkoortitseriaaseq-mi taaneqartut soqutiginaateqarsinnaapput, tassani ilaallutik ’inuialaarsuarmiikkusuttut’, ’piviusunik ujartuisut’ aammalumi inuiannik soqutigisaqartut.

”Tiimit arlallit sumiffimmiittoqartariaqarpoq, taamaalilluni pinngortitamit sunnerneqarnissaq periarfissaqarniassammat. Inuilaarsuup sunnersinnaavaatit. Taamaanngippat takullatsiagaannaassaaq.”


- Inuiannik soqutigisalik

Eqqaamallugulu sullississutit pilerinartuussagunik imaluunniit ’misigisatut’ isigineqassagunik migipallanneqartariaqanngitsut pissanganartuusariaqaratillu.

Sullississutinik ineriartortitsineq

Kalaallit Nunaanni takornariartitsisarnermik inuussutissarsiortut sullississutiminnik ineriartortitsinerminni eqqissisimaarluni misigisassat naleqassusii isumaliutigisinnaavaat, eqqaamallugulu sullississutit pilerinartuussagunik imaluunniit ’misigisatut’ isigineqassagunik migipallanneqartariaqanngitsut pissanganartuusariaqaratillu. Tamassuma saniatigut taaguut ’eqqissilluni inuuneq’ atorneqarsinnaavoq, pingaartumik nunaqarfinni mikinerusuni.

Sullississutit kulturimi pinngortitamilu sammisaqartitsinermik imaqartut piffissani eqqissisimaarfinni nunaqarfimmiut peqataaffigisinnaasaat ussassaarutigineqarnissaat ineriartortinneqarnissaalluunniit takornariartitsisarnermik inuussutissarsiortut isiginiarsinnaavaat. Malugalugu taaguut ’eqqissilluni’ tamatigoortuusoq misissuilluaraannilu sumiiffinni assigiinngitsorpassuarnik pisoqarsinnaasoq. Ilorrisimaarnermut kulturilu pillugu eqqarsaasersuuteqarnermut atatillugu eqqissillutik takornarissanut sullississutit Kalaallit Nunaanni piffissat takornarissat ikiffiannut ineriartortitsinermi atorneqarsinnaapput.

Takoqqusaarineq attaveqarnerlu

Eqqissilluni misigisassani ilorrisimaarneq, imminut nappassinnaaneq peqqissuserlu misigissutsinut tunngassuteqarpata naleqassutsit taakku Kalaallit Nunaannik takoqqusaarinermi atorneqarsinnaapput. Nunap ilisarnaataa Big Arctic Five tassaavoq Kalaallit Nunaanni misigisassat, periuserli ’Maligassiuisuugit’ iluarilluakkanik misigisaqarfiusariaqarpoq, eqqissilluni misigisassat imaluunniit misigisaqapallanneq pineqaraluarpata.

Internetikkut attaveqaat


Kalaallit Nunaanni atassuteqaatit digitaliusut amerlisarnissaat arriitsumik sulissutiginerani aammalu Kalaallit Nunaanni nunp immikkoortuisa akornanni atassuteqaatinik aqquteqanngitsunik pitsanngorsaaniartilluta ’digitali atorlugu atassuteqartarnermik toqunartuiaaneq’ Skotlandimi Caribiamilu takoqqusaareriaatsimi atorneqartup iluaqutai takoqqusaaritigineqarsinaapput. Internetimiinnginneq iluaqutitut atoruk!

Annertunerusumik paasisaqarusupput? Isumassarsiassatut siunnersuut taanna B2B-mi nutaarsiassat tulliuttut ilaanni oqaluttuaqqaanik malitseqartinneqarumaarpoq.

  • ATTA (Adventure Travel Trade Association) takornarissat misigisaanik imatut nassuiaasiorpoq angalaneq sammisat uku akornanni marlunnik imaqaraangat: kulturi, pinngortitaq imaluunniit timeq atorlugu sammisaqarneq.
  • Eqqissilluni takornariarneq takornarissat misigisassarsiortarnermik eqqarsartariaasiannut naleqqulluarsinnaavoq: Kalaallit Nunaanni nunap ilisarnaataanut Pioneering Nation eqqarsarluareernikkut naleqqussinnaavoq. Imatut oqaasertalerlugu tikiffik innuttaasut piumassuseqqortuut nutaaliaasumik inuuffiat, tassungalu peqatigitillugu qangalili inuunneqarnissamik pingaartitsisut, takornarissat tassani Kalaallit Nunaanni allaanerusumik akerliissunillu misigisaqarnissannik neqeroorifigineqartarput.