Ukiuni kingullerni amerlanngitsuni Asiamiut Kalaallit Nunaannut angalasartut annertuumik amerleriarsimapput.

Paasissutissat

Ukiuni kingullerni amerlanngitsuni Asiamiut Kalaallit Nunaannut angalasartut annertuumik amerleriarsimapput, annermik Kinameersut, tassaalluni ukiunut siuliinut naleqqiullugu ineriartorneq nutaajukannersoq.

Angalasartut amerliartornerat taanna suli ineriartortikkumallugu Visit Greenlandip pulaffissat assigiinngitsut amerlanngitsut atorlugit takornarissat Asiameersut minnerunngitsumillu Kinameersut siunnerfiginissai sulissutigaa.

B2B: Kinami Issittumut Angalatitsisartut Ataatsimeersuartinnerat

10.–14. marts Qaasuitsup Kommunia aamma Visit Greenland angalatitsisartut saqqummersitsinerannut, paasiniaalluni angalanermut workshopimullu ataqatigiissillugit aaqqissuussanut qaaqqusisuupput, taallugu ”Kinami Issittumut Angalatitsisartut Ataatsimeersuartinnerat”, Kinami avammut tuniniaavik qitiutillugu perngaammik Kalaallit Nunaanni ingerlanneqartoq. Angalatitsisartut suleqatigiissut – angalatitsiviit – Islandimiit taavalu Danmarkimiit tamarmik immikkut Kinamiit qaaqqusassatik 1-3 qinersimavaat, Kinami angalatitsiviit anginerit akornanni, aammattaaq Air Greenland aamma Air Iceland peqataasoralugit, qaaqqusat tikiuttut katillugit 20 sinnerlugit amerlartigisut tamarmillu Hotel Arcticimi inisimatinneqarlutik.

Ataatsimeersuartitsineq Ilulissat pillugit kisianni aamma ataatsimut isigalugu Kalaallit Nunaannik nalunngisat annertusarneqarnissaannik siunertaqarpoq, ukiuunerani tikitassatut kisimi pinnani kisianni aamma junimiit aggustip qeqqanut angallaffiunerpaajusoq sioqqullugu imaluunniit kingorna Kinami pisisartut aggulussimanerisa ilaannut siunnerfeqarluarsinnaasutut takorloorlugu.

Naak qimusserarneq peqataasunut tamanut iluatsinngikkaluartoq, Ilulissani qimussiussisinnaasut nalaatsornikkut amigarnerat pissutaalluni, Kinamiit peqataasut takornariartinneqaqattaarlutik nukatsinneqarput, Kangerlussuarmut periitsiaannartut Air Greenlandip helikopteria tusaamasaq S61 atorlugu sermersuarmut angalaneq aamma ilaalluni, aamma suluusalimmik AirZafarip timmisartuutaanik Ilulissani angalatinneqarlutik. PGI Greenland aaqqissuisoralugu Nunarsuarmiut Kingornuttagassaanni maakkarnaveeqquserluni pisuttuarneq alutornarnerpaanut allanut ilaapput, World of Greenland aaqqissuisoralugu illoqarfik angalaarfigalugu, taavalu sapaatip akunnerata naanerani angerlarlutik aallanngitsut Oqaatsunut/Rodebayimut qamuteralannik angalallutik, North Greenland Adventurep aamma PGI Greenlandip peqatigiillutik neqeroorutaat paasisaqarfigineruniarlugit.

Ataatsimeersuartitsineq Ilulissat pillugit kisianni aamma ataatsimut isigalugu Kalaallit Nunaannik nalunngisat annertusarneqarnissaannik siunertaqarpoq.

Angalatitsisartut ataatsimeersuartinneqarnerisa toqqaannartumik kingunerisaannik Ilulissanut angalanerit nutaat suut tamarmik ilaatereerlugit maanna piareersarneqarput ukiut 2015 aamma 2016 eqqarsaatigalugit.

Ullup affaa angalatitsisartut saqqummersitsinerat Hotel Arcticip Greenland Roomiani ingerlanneqarpoq, tassani peqataallutik Ilulissani takornarialerinermik ingerlataqartut pingaarnerit tamarmik, sioqqullugulu nunarsuarmi kommuneqarfiit annersaanni teknikinut pisortaasup mittarfiup tallineqarnissaanut illoqarfiup pilersaarutai annertuut ataatsimut isigalugu ilisaritippai.

Unnuk kingulleq ‘The GlacierShop’-ip atisanik takutitsineq pitsaalluinnartoq aaqqissuullugulu ingerlappaa, ammit atisat Great Greenlandimeersut, Isaksen Designimiit taavalu Nuuk Couturemiit sammiveqaqqajaanerit kingulliit takutillugit, unnuillu tamaasa nerisassat immikkut illuinnartumik master chefimit Jeppe Ejvind Nielsenimit pilersinneqarlutik, nerisassat sumiiffimmeersut aallaavigalugit annikitsumillu Asiamiorpalaartillugit.

Angalatitsisartut ataatsimeersuartinneqarnerisa toqqaannartumik kingunerisaannik Ilulissanut angalanerit nutaat suut tamarmik ilaatereerlugit maanna piareersarneqarput ukiut 2015 aamma 2016 eqqarsaatigalugit.

Promote Iceland / VIsit Greenlandillu Aallartisaanerat

Kinami Issittumut Angalatitsisartut Ataatsimeersuartinnerat iluatsilluartoq toqqammaviliullugu aprili qiteqquttoq Visit Greenland Kinami ulluni arfinilinni tuniniaavimmik takutitsinermi peqataavoq, Kinami angalatitsiviit 300 sinneqartut peqataaffigisaannik, illoqarfissuarni assigiinngitsuni ukunani tallimani: Beijing, Tianjin, Nanjing, Hangzhou aamma Shanghai.

Promote Iceland aaqqissuisoralugu Islandillu Kinami ambassadøria Hr. Stefán Skjaldarsson qaaqqusisoralugu tuniniaavimmik takutitsinerup siunertaa tassaavoq Kalaallit Nunaanni Islandimilu niuernermik soqutiginnilersitsinissaq. Angalatitsisareersut taavalu angalatitsisartunngornissamut piukkunnartut ornitassat taakku marluk qanimut ilisarititsiffiginissaannut periarfissatsialaavoq, soorluttaaq aamma takornarialerisut Kalaallit Nunaannik Islandimillu ataatsikkut tuniniaasartut toqqaannartumik attaveqarfigilernissaannut. Selskabit qulingiluat Islandimiit peqataapput kiisalu takornariaqarnermik ataatsimiititaliat marluk, katillugit peqataasut 20-ullutik.

Visit Greenland Kinami angalatitsisartunik specialistinik akisuunik suleqatissarsiorpoq, pisisartuisa akornanni ilaatigut arsarnernik, pinngortitamik, nerisassanik kulturimillu soqutigisalinnik. Illoqarfissuarnit anginerniit Beijingimiit aamma Shanghaimiit peqataasut Kalaallit Nunaat nalunngisaqarfigereerpaat, tuniniaaviillu Nanjing aamma Hangzhou niuernissamut piareersimapput.

Visit Greenland Kinami angalatitsisartunik specialistinik akisuunik suleqatissarsiorpoq.

Visit Greenland paasissutissanik pilersitsivoq, takornarissat Kinamiunik siuaasallit kulturikkut annertunerusumik paasisaqarfigilernissaannik imalik.

Kiffartuussinermik sullissisut angalasunut Kinameersunut piareersarnissaat

Aamma Kalaallit Nunaanni kiffartuussinermik sullissisut neqeroorutimik angalasunut Asiameersunut saaffiginnitsillugit tulluarsarnissai isumaliutigisariaqarpaat. Tamanna pisariillisarniarlugu Visit Greenland paasissutissanik pilersitsivoq, takornarissat Kinamiunik siuaasallit kulturikkut annertunerusumik paasisaqarfigilernissaannik imalik, taakkununnga ilaallutik qanoq pilersaarusiortarnersut inniminniisarnersullu aammalu hotelimi ini qanoq ittoq piumanerusarneraat. Assersuutigalugu hotelimi inimi uunnaaveqarnissaq assorsuaq pingaarpoq!

Aamma Kinamiut qanoq pissusilersorfiginissaannut siunnersuutitaqarpoq. Mappersagannguaq manna EU-p iluani aammalumi uagut nammineq misissueqqissaarsimanitsinnik tunngaveqarpoq. Naak angalasartut Kinamiut Kinameersut qitiutinneqaraluartut paasisat aamma Asiami nunanit allaneersut ilisarnaataannut tunngatinneqarsinnaapput, minnerunngitsumik Kinamiut Kinap avataanut nuullutik nunassissimasut ilaatigullu ’ileqqutoqqanik attassinerusutut’ isumaqarfigineqarsinnaasunut.


Alloriarfissat tullii

Visit Greenland B2B-kkut suleqatini peqatigalugit Kinami takornarialerinermik industriip ineriartortinnerani suleqataajuarsinnassaaq. Visit Greenland soqutiginninneq pioreersoq allisarniarlugu greenland.com tamarmiunngikkaluaq kinamiut oqaasii atorlugit saqqummersinniarpaa, aamma B2B angallassisartut PR-iinik inooqatigiillu attaveqaataanni suliaqarnerannik ikiortarlugit.

Kiisalu aamma Asiamut periaasissap pilersinnissaanut suliniuteqassaagut, timmisartornikkut aqqutit pioreersut allallu nutaajusinnaasut isumaliutigisassanut ilaatillugit, soqutigisaq nunap immikkoortuani sua’tungaaniinnersoq taavalu tuniniaaviup immikkoortuata iluani uagut piumanerusavut qitiutillugit.