Pitsaanerusumik nittarsaassisoqarnissaanik nioqquteqartoqarnissaanillu kissaateqarneq

Ukiuni arlaqalersuni Kujataani takornariat savaateqarfinni unnuisinnaasareerput. Tamatumunngali neqeroorutit pillugit paasissutissat, unnuiffissani pissutsit qanoq pitsaatiginersut, ilaatigullu allaat qanoq ililluni inniminniisoqarsinnaanera ajornakusoornikuuvoq.

 

Taamaammat ukiut arlallit matuma siorna Ellen K. Frederiksen, Qassiarsummi savaateqarfimminni uinilu unnuisarfik Illunnguujuk ingerlallugu, Islandimi naasorissaasut takornariarfigineqartartut peqatigiiffiat, Icelandic Farm Holidays, atassuteqarfigaat.

 

”Islandimi Nunatsinnilu savaateqarfinni takornariartarneq pillugu suleqatigiittoqarsinnaanera misissorakku, Islandimi Nunatsinnilu tamatuma tapersersorneqarluarnera paasillugu qiimmaallannarpoq.”, Ellen oqarpoq.

Kalaallit Nunaanni savaateqarfinni unnuisitsisarnerup pitsaassusaata nalilernera

Taamatut atassuteqarneq 2015'imi Visit Greenlandip timitalerniarlugu, Icelandic Farm Holiday suleqatigalugu suliniuteqaatissamik aalajangersaaneq aallartippaat. Suliariniagaq taanna Grønlandsbankenip Inuussutissarsiornermut Aningaasaateqarfianit kiisalu NATAmit aningaasaliiffigineqarnikuuvoq.

 

”Pissusissamisoortumik alloriaqqinneq suliniutigineqaannassaaq”, Anders la Cour Vahl, Visit Greenlandimeersoq nassuiaavoq. ”Kalaallit Nunaanni neqeroorutigineqartartut pitsaassusaat qanoq nalilerneqarsinnaanersoq siullermik misissussavarput, tamatumalu kingorna Nunatsinni savaatiqarfinni takornariartarneq assigiiaartumik pitsaassuseqarsinnaaqqullugu aalajangersagaqassalluta. Aalajangersakkat taakkua aallaavigalugit, angallassinermi peqataasunut neqeroorutigisatta qanoq ittuunerannik kiisalu tuniniaanermi nittarsaanermilu isumaqatigiissutitigut piumasaqaataasut pillugit nassuiaalluarnissatsinnut periarfissaqassaagut”.

 

Juulip qaammataani savaateqarfiit unnuisarfiusussat misissuisussanit Icelandic Farm Holidays'imeersunit misissorneqarput, Islandimi nunaateqarfinni unnuisitsisarnermi pitsaassutsimik nalilersukkanut sanilliullugu unnuisarfinni ataasiakkaani pissutsit nalilersussallugit.

 

”Ukiuni kingullerni pingasuni nammineq nalilersuutigisartakkagut atortarpagut, unnuisarfiillu soorlu angerlarsimaffinnut atasuni Bed & Breakfastini, hostelsini, nunaqarfinni akunnittarfinni imaluunniit illuaqqani, ”ineeraq immikkut imaluunniit ataatsimoorussamik uffarfilik”, nerisassiorfigineqarsinnaasut immikkoortinneqartarlutik. Siniffissat oqorusersorneqartarnersut imaluunniit siniffiup puuanik attartortoqarsinnaanera aamma immikkoortittarpagut. Pitsaassutsimik naliliissutissat tamarmik minnerpaamik piumasaqaataasunik imaqarput. Ingerlaavartumik naliliisoqartarlunilu piumasaqaatinik nutarterisoqartarnissaa aallaqqaataaniit eqqumaniarfiginikuuarput. Pitsaassutsimik piumasaqaatit taamattut qulakkeersinnaanikuuagut – takornariat pingaartitarisartagaattut – unnuisarfiit tamarmik immikkooruteqartarsinnaanerat aamma malittarisassiorneqarluni”, Berglind Viktorsdóttir, Icelandic Farm Holidaysimeersoq oqaluttuarpoq.

Misissuilluni nalilersuinerit savaateqarfiit immikkoortitaarlugit nalunaarusiornernik malitseqartinneqarput, nalilersuinermilu unnuisarfiit qanoq inissinneqarnersut nalunaarsorneqarnerat aallaavigalugu, nersualaarlugit kiisalu pitsanngorsaanissamut aalajangersimasunik kajumissaarlugit.

 

Septembarip aallartinnerani, kalaallit savaatillit peqataasut Islandimi nunaatillit unnuisarfiuteqarlutillu sammisassaqartitsisartut arlallit isumassarsiorfiginiarlugit tikeraarpaat, ilaatigut unammilligassat assigiinngitsut Islandimiut nunaatillit qanoq aaqqiiffigisimaneraat pillugit nammineq aperalugit isummersuutissarsisinnaallutik. Islandiliaqatigiinnermut atatillugu isumasioqatigiittoqartarpoq, taakkualu kingunerannik kalaallit savaatillit unnuisarfittut periarfissarititaasa, pitsaassutsinut assigiinngitsunut immikkoortiternissaannut nalinginnaasumik piumasaqaatit.

 

Visit Greenlandip aamma filmiliaq nangeqattaartoq ”Explorers by Nature” inaarsarpaa. Tassani savanik katersineq takutinneqarpoq taamaalilluni savaatillit pillugit oqaluttuarniarnermut ilanngunneqarsinnaallutik.

”Suliariniagaq aamma aallarnisaaneq iluatsilluartoq! Ukiap ukiullu ingerlaneranni savaatillit tamarmik immikkut periusissaminnik pilersaarusiorneranni oqaloqatigisassavagut. Unnuisarfiutillit pitsaassutsitut anguniakkaminni piumasaqaataasunik naammassisaqarnissaat siunertaraarput. Tamakkua ingerlannerisa nalaanni aamma nunat tamat akornanni taamatut takornariartitsisartut ujartussavagut, Kujataani savaatilinni takornariartarsinnaanerup inerisarlugu annertuunik periarfissaqarfiusoq maluginiarniassammassuk”, Anders la Cour Vahl naggasiivoq.

 Savaatillit unnuisitsisartut peqataasut ukuupput: (korti: Nunagis)