Kalaallit Nunaannit peqataasut

Februarimi sapaatit akunnerisa siullianni tradeshow Mid-Atlantic ingerlanneqarpoq, taannalu Vestnorden Travel Mart-ip (VNTM) nunatsinni tamatta nalunngisatta assigaa Icelandairip ukiumoortumik aaqqissuuttagaa ingerlalluartoq.

Kalaallit Nunaannit ilaatigut peqataapput Arctic Wonderland Tour, Destination East Greenland, Destination South Greenland, Sermersooq Business Council, Hotel Icefiord, Greenland Travel, World of Greenland, Air Greenland soorunalumi aamma Visit Greenland.

Pisisartut



Pisisartut toqqakkat amerlanerat pissutigalugu ullormi ataatsimi tradeshowip ingerlanerani ulapittoqarpoq ataatsimiinnerpassuillu ingerlanneqarlutik, 15 minutsillu ataatsimiinnernut ataasiakkaanut atugassartinneqartut saniatigut inuit naapeqatigiinneranni pisisartunut attaveqarnissamut periarfissaqarluni.

Icelandair Amerikap Avannaani Europamilu tikiffinnut 39-inut angalatitsisarpoq, taamatullu aaqqissussisut amerlasuunik attaveqarfeqartarput angalatitsivinnillu qaaqqusinissamut suleqateqarnissamullu tunuliaquteqarluarlutik. Pisisartut aammattaaq annertunerusumik annikinnerusumilluunniit ilaannakortumik akiliillutik Islandimut qaaqquneqarput, tuniniaasartut aamma timmisartortitsiveqatigiiffiup angalatitsivigisartagaanit akeqanngitsumik angalatinneqarneq iluaqutaalluarpoq. Savalimmiuniit amerlasuut aamma Mid-Atlanticimi peqataapput.

Illit suliffeqarfivillu ukiup tulliani 4-7 februar Mid-Atlanticimi peqataanermi aningaasartuutivit pissarsissutigilluarnissaat ilimagisinnaanerit pillugu Visit Greenland siunnersuilluarsinnaavoq.