Kalaallit takorlooruminaatsissinnaasarpaat inoqarmat neqitaqanngivissunik nerisartunik, naak nunarsuarmi innuttaasut ilarparpassui namminneq qinersimasaminni knaasuinnarnik nerisaqarnissamik inuusaaseqaraluartut.

 

Taassumalu saniatigut kattuffiup Nerisassanik Sapigaqarnermik Misissuisartut & Ilinniartitsineq inuit Amerika Avannarlermiut Europamiullu 30 millioninik amerlanerusut nerisassanik imarmiunik imaluunniit immunnik taakkunanngalu nioqqusianik imaluunniit qaqqortarissanik sapigaqartuunissaat taggippaat.

 

Inuit aamma taamaattut tassaapput nunatsinnut tikeraartartut, uagullu suliassaraarput nerisassatigut kissaataannik pisariaqartitaannillu sapinngisarput tamaat nerisaqartissallugit, naak suli tamanna iluamik sungiusimanngikkaluarlugu. Illoqarfiit ilai nerisassatut qinigassat allat neqeroorutigisinnaasaat illoqarfinnut allanut naleqqiullugit amerlanerugaluartut puuguttami kuloruuju/musaq ooqanngitsoq kisiat pinnagu eqqarsarluarnerusinnaasussaavugut.

 

ILUATSITSILLUARNISSAMUT ISUMASSAT

Sillimareertarlutit! Tikeraat nerisassatigut immikkut ittunik pisariaqartitsisut pitsaanerpaamik sullinniarukkit suut noqqaassutigisinnaasaat sillimaffigeriissavatit siumullu piareersimaffigereerlugit.

 

  • Neriniartarfimmik piginnittuuguit, inuit nerisartagaasa akornanni ataani nalunaarsorsimasuni qinigassaq minnerpaamik ataaseq tamatigut akuutigisartakkatit nalinginnaasut atorlugit igasinnaasat eqqaamasaruk. Isumassarsiorfigisinnaasanut ilaavoq assersuutigalugu ’opskriftit/najoqqutassat glutenertaqanngitsut’ Googilissallugu.

 

  • Pitsaanerussaarli qinigassat akornannut/menukortimut nerisassat naasuinnarnik akullit imaluunniit Paleo ilanngukkukkit erseqqissumillu taama taallugit.

 

  • Cafémik piginnittuuguit, cappuccinos aamma lattes laktosertaqanngitsut qinigassanut ilaatikkumallugit immummik laktosertaqanngitsumik nillataartitsivimmiititaqartuaannarit.

 

  • Ornitami misigisassanik tuniniaasartuuguit imaluunniit angallassisartuuguit, tikeraartussat aperikkit nerisassat pillugit immikkut ittunik noqqaarusunnersut, taamalu siusinaarlutit piareersimaffigilersinnaassavatit.

 

  • Kiisalu eqqaamallugu, noqqaanerit taamaattut taakkununnga nerisassiortussanut apuutissagakkit.

 

  • Tikeraartut pisariaqartilissagaluarunikku namminneq nerisassanik pisiniarfigisinnaasaannik ammasarfiinillu ilisimatikkit.

  • Immakkut angallannermik isumaginnittartuuguit, eqqaamalaaruk sukkulaat kaagiaqqallugu inuit ilaannut piukkunnanngilluinnarsinnaasarmata. Naatitat paarnai nutaat qinigassatut allatut periarfissaatikkit.

 

NERISARTAKKAT PILLUGIT ORDBOGI

Aana nerisartakkat akornanni immikkut piumaneqartartut nalinginnaanerpaat 6 naatsumik nassuiarneqarnerat, suut iisinnaanngisaannik akoqarnersut suullu taarsiullugit atorneqarsinnaanersut.

 

Laktosemik akoqanngitsunik nerisartut (laktosemik annerusumik minnerusumilluunniit sapigaqartut)

Inuit taamaattut immummit suliaasunik immulluunniit akugalugu suliaasunik nerisinnaanngillat, sapigaqarnertik pissutigikkajuttarlugu.

Iisinnaanngisaat: yoghurt, immussuaq, immuk, creme fraiche, flødeskum, flødeost, punneq, miseqqanut akuutissat.

Taarsiullugit atorneqarsinnaasut pitsaasut: Sunaluunniit laktosemik akoqanngitsoq soorlu flødeost laktoseqanngitsoq imaluunniit mandelinit immuliaq imaluunniit soyamik immuliaq.

 

Glutenimik akoqanngitsunik nerisartut

Inuit taamaattut karrinik, pastanik qajuusianilluunniit suugaluartunik akulinnik nerisinnaanngillat, sapigaqarnertik pissutigikkajuttarlugu.

Iisinnaanngisaat: müsli, issingigassat ullaakkorsiutillu allat assigisaat, spaghetti, kaagi imaluunniit tærte, iffiaq qaqortoq, iffiaq, kisseeqqat, miseqqanut akuutissat, immiaaraq/baaja.

Taarsiullugit atorneqarsinnaasut pitsaasut: Igaanut qaqorteqqasut/suaasat namminneq naasartut imaluunniit quinoa. Iffiassanut akuutissat suulluunniit glutenimik akoqanngitsut taamaattunulluunniit taarsiullugit atugassat soorlu mandelinik qajuusiat, kokos panertissinnarlugit qajuusiat aamma majsmel tulluartuupput. Iggisissatullu cider, viinni imigassallu.

 

Nerisartakkat Paleot

Inuit taamaattut laktosemik akoqanngitsunik aamma glutenimik akoqanngitsunik nerisartuupput kisiani tamakkunuunatigut suli sukannernerullutik. Tassa aamma sukkoqanngitsunik aamma imigassartaqanngitsunik nerisartuummata.

Iisinnaanngisaat: Glutenimik akoqanngitsut qulaani taaneqartut tamaasa. Qaqorteqqasut/ suaasat aamma quinoa. Naatsiiat/kartoffelit, majsit, eertat, eertat amitsukujuut naatitallu allat qerattarsaatillit. Sioraasat, tungusunnisaatit, mammalaajat, mamakujuttut/mamakujuit. Immiaaqqat/baajat, cider, imigassat aamma viinni qaamasoq.

Taarsiullugit atorneqarsinnaasut pitsaasut: Paleotinik nerisartut neqiminermik angisuumik naatitanik qorsunnik ilalikutsoorlugit aamma naatsiianik/kartoffelinik tungusunnitsunik, qasilitsut inerittuinik taavalu avocadonik tuninissai aarlerinartoqakkajunneq ajorpoq. Kinguleqqatut naatitat inerittui nutaat imaluunniit uutat pitsaapput, igutsaallu tungusunnitsuutaa (honning) tungusunnissaatitut akuerineqartarpoq. Viinni aappalaartoq ingasaappallaarnagu iggisigissallugu naleqqunnerpaavoq.

 

Naasuinnarnik nerisartut

Inuit taamaattut neqinik qanorluunniit ikkaluartunik nerineq ajorput, taamaakkajuttarlutillu uumasut pisinnaatitaaffiinik imaluunniit peqqinnissakkut siunnerfilinnik tunngaveqarlutik tamanna isummamikkut aalajangiussimagamikku.

Iisinnaanngisaat: Neqit aappaluttut soorlu savaaqqap, nersussuup, tuttup, umimmaap, arferup puisilluunniit neqai. Bacon. Neqit qaamasut soorlu kukkukuup puulukillu neqai. Nerisassat imarmiut soorlu aalisakkat aamma qaleruallit aamma mattak. Nersussuup neqaanit suppaliaq aamma kukkukuup neqaanit suppaliaq.

Taarsiullugit atorneqarsinnaasut pitsaasut: Suppanut igaanullu allanut suppa naatitanit pisoq atortaruk. Igaat pastat amerlasuunik naatitalersorlugit. Salaati nutaaq.

 

Veganiusut nerisartagaat

Inuit taamaattut naasuinnarnik nerisartut assigalugit neqinik qanoq ikkaluanilluunniit nerineq ajortuupput kisianni suli sukannernerullutik. Aamma sunik uumasuneersunik akulinnik nerineq imernerlu ajorput, allaat uumasoq toqunneqarsimanngikkaluaraangalluunniit, soorlu immuk. Uumasut pisinnaatitaaffiisa illersorneqarnissaannik tunngaveqarlutik taama ittunik nerisartagaqarput.

Iisinnaanngisaat: Naasuinnarnik nerisartut assigalugit taakku iisinnaanngisaat tamaasa. Laktosemik akoqanngitsunik nerisartut assigalugit taakku iisinnaanngisaat tamaasa. Manniit honningilu qaavatigut ilanngullugit.

Taarsiullugit atorneqarsinnaasut pitsaasut: Agavep sikkernerata tungusunnitsua (nektar) tungusunnissaatitut atorlugu. Suppanut igaanullu allanut suppa naatitanit pisoq atortaruk. Igaat pastat amerlasuunik naatitalersorlugit. Salaati nutaaq.

 

Pescetarit nerisartagaat

Inuit taamaattut uumasut nunamiut neqaannik nerineq ajorput, taamaakkajuttarlutillu uumasut pisinnaatitaaffiinik imaluunniit peqqinnissakkut siunnerfilinnik tunngaveqarlutik tamanna isummamikkut aalajangiussimagamikku.

Iisinnaanngisaat: Neqit aappaluttut soorlu savaaqqap, nersussuup, tuttup, umimmaap, arferup puisilluunniit neqai. Bacon. Neqit qaamasut soorlu kukkukuup puulukillu neqai. Nersussuup neqaanit suppaliaq aamma kukkukuup neqaanit suppaliaq.

Taarsiullugit atorneqarsinnaasut pitsaasut: Aalisakkat aamma qaleruallit. Suppanut igaanullu allanut suppa naatitanit pisoq atortaruk aamma aalisakkanut suppa aalisakkanit pisoq. Igaat pastat amerlasuunik naatitalersorlugit. Salaati nutaaq.