Takusassanik oqaluttuartunik suliarneq pillugu suleqatigeeriaaseq nutaaq

Business-to-business-imi Kalaallit Nunaanni avataanilu suleqatit qanimut suleqatigalugit assinik assigiingiiaartunik takusassanillu oqaluttuartunik ingerlaavartumik pilersitsinissamik qulakkeerinnittussanik assinik pilersitsisarnermik aammalu assigiinngiiaartunik takoqqusaarisarnermut ilisarnaammillu takoqqusaarisarnermik pitsaanerusumik periarfissaqarnissaq qulakkeerniarlugit Visit Greenland periutsimik nutaamik pilersitsinissammik aallartitsivoq.

Visit Greenland periutsimik nutaamik pilersitsinissammik aallartitsivoq.

Assinik toqqorsivik Flickr Kalaallit Nunaani avataanilu suleqatit annertuumik atortarpaat

Toqqorsivimmik Flickr-imik ineriartortitseqqinneq

Media-gl-imi nuna tamakkerlugu assinik toqqorsivik Flickr Kalaallit Nunaani avataanilu suleqatit annertuumik atortagaat periusaavoq ullumikkut pilersinneqarnikuusoq ilisimaneqarluarlunilu.

Toqqorsivik ingerlaavartumik annertusarneqartarpoq ineriartorteqqinneqarlunilu, aammalu assinik arlalinnik annikitsunik assinillu ataasiakkaanik assiliisarnerup pisisarnerullu saniatigut suleriaaseq nutaaq Visit Greenlandip 2014-imi aallartinnikuuaa, tassani takornariartitsisarnermik inuussutissarsiortut suleqatigalugit misigisassarsiorneq pillugu oqaluttualiortarluta, taakkulu Kalaalli Nunaanni misigisassarsiorneq takussutissinniarlu amerlasuunut siaruarneqartarput.

Tassani takornariartitsisarnermik ingerlatsisut peqatigalugit ingerlattarparput, taakkulu suleqatigiinneq namminneq aallartittarpaat aammalu siaruarterinissamut tapersiisarlutik assillu tulleriiaartut qanoq isikkoqarnissaannik ineriartortitsinissamut siunnersuuteqartarlutik.

Isumassarsiamiit assinut tulleriiaartunut

Visit Greenland suleqatimit saaffiginnissut tunngavigalugu sullississutit suut assilineqassanersut oqaluttuamullu ingerlatsisup suut kissaatiginerai oqaloqateqarpoq. Tassunga peqatigitillugu suliaq qanoq isikkoqassanersoq nalilersorparput, taammaliluni nuna tamakkerlugu Pioneering Nation branding-ip isikkulersorneranut naleqqutissalluni sulianullu allanut tunngatillugu tulleriiaarinermi sumut inissinneqassanersoq.

Suleqatigiinnerup taamaattup assit tulleriiaartut assigiinngitsorpassuarnut atorneqarsinnaasut pisinnaalersippai, tassa assit amerlassusaat angalatitsisarnermik ingerlatsisunut, avataani suleqainut, tusagassiorfinnut, nittartakkanut, internetimi inuit attaveqaqatigiittarfiinut naammammata, uagullu nammineerluta assit assigiinngiiaartut atorlugit oqaluttuanik assigiinngitsunik oqaluttuarsinnaalluta.

Assit atornissaat akeqanngilaq, tassungalu peqatigitillugu internetimiit killeqanngitsumik pissarsiarineqarsinnaallutik aammalu Kalaallit Nunaata misigisassarsiorluni tikiffissatut takoqqusaarutigineranut atatillugu takoqqusaarinerni asigiinngiiartumik atorneqarsinnaalersillugit Flickr-imi akuersissutit nutaamik ineriartortinneqarnikut atorlugit avitseqatigiissutigineqarsinnaallutik. Suleqatigiinnerullu aalajangersimasup kingunerata atuisut amerlasuunut atorneqarsinnaalersinneratigut suliap nalinga annertuumik annertusineqarpoq.

Assit atornissaat akeqanngilaq, tassungalu peqatigitillugu internetimiit killeqanngitsumik pissarsiarineqarsinnaallutik

nutaarluinnarmik atortorissaateqarluartumillu pilersitsinermik kinguneqarpoq

Qeqertarsuup Tunuani qajartorluni misigisassat nutaat

Takussutissiiluni tamakkiinerusumik oqaluttuariaatsimut assersuutissat siulliit ilaat Qeqertarsuup Tunuani qajartortitsisartoq suleqatigalugu ukioq manna augustimi suliarineqarpoq.

Marc Carrerasip Ilulissaneersup PGI Greenland-imik atserlugu PasGrau International-imik suleqateqalerpoq aammalu sumiiffimmi siaruaanermut tapersiineq pillugu North Greenland Adventure suleqatigilernikuullugu, tamannalu Oqaatsuni sutorniartarfiup H8-ip eqqaani illuni imarsiornermut atorneqartartuni qajartornermut sullissivimmik nutaarluinnarmik atortorissaateqarluartumillu pilersitsinermik kinguneqarpoq.

Qajartorluni misigisassat atuisut misigisassarsiortarnermi misilittagaannut naleqqussakkat Kalaallit Nunaanni amigaataasorujussuupput, Oqaatsumilu qajartornermik sullissivik aallarterlaat misilittagallillu Qeqertarsuup Tunuani ilulissat arferillu akornanni misigisaqartissinnaalerlugit sullissinermut taamaattumut naleqqussakkamik misigisassarsiortitsisinnaavoq.

Assilisanit tulleriiaartunit takussutissat atorlugit oqaluttuanut

Sullississutip nutaarsiassartaata iluaqutigineqarsinnaanera aammalu nuna tamakkerlugu assinik toqqorsivimmi qajartortarnermik assit amigaataanerat nunatsinni assit pillugit suleqatigiinnissannut aallarnisaalluni suliniutip suliassatut isigineqarnissaa ajornannginnerulersippaa.

Pingaarnerpaajuvorli Marc Carreras aamma North Greenland Adventure statistit, takornariartitsisartut angallatillu atorlugit ulloq naallugu assiliinissamut piffissaqarsinnaasimammata suliaqarlutillu, taamaalilluni assiliinermi aaqqissuussamik angalaneq pisariaqarnani, tassungali taarsiullugu assit suleqatit kissaatigisaannut pisariaqartumik sukkassusilimmik assiliisoqarsinnaasimalluni.

Suliniummik suleqatigiinneq taamaalilluni assit 25-t maannakkut sumiiffinni sullissisartunit, taakku nunani nunani tamani suleqatigisaannit PGI-mit aamma Visit Greenlandimit atorneqarsinnaalernikut atorlugit oqaluttuarnermik kinguneqarpoq. Assit tamassuma saniatigut suleqatinit soqutiginnittunit allanit sullississutinik aallussilluarluni takoqqusaarinissamik imaluunniit siamasinnerusumik ilisarnaammik takutitsinissamik oqaluttuarnissamillu kissaateqartunit  tamanit atorneqarsinnaapput, taakkulu nuna tamakkerlugu toqqorsivimmi Flickr-imi pissarsiarineqarsinnaalersinneqarput.

Suliniuteqariaaseq taamaattoq Visit Greenlandimut kinguneqarpoq suleqatigiinnissamut periarfissat siunissami annertusiartortumik isiginiarneqarnissaannik, tassani angalaarnissamut aaqqissuisartut, nunap immikkoortuini tikiffissat suleqatillu allat suliniummik, misigisassamik, tikiffissamik assigisaannillu sooq qanorlu oqaluttuarnissamik isummersinnaallutik, aammalu assiliinissamik taamaattumik suleqatigiissinnaaneq pillugu suleqatit soqutiginnittut oqaloqatigerusuttorujussuuvagut.

Annertunerusumik paasisaqarusukkuit uunga allagit photos@greenland.com.

Assiliinissamik taamaattumik suleqatigiissinnaaneq pillugu suleqatit soqutiginnittut oqaloqatigerusuttorujussuuvagut