Assiliiniartunik angalatitsinerit nunarsuarmi angalatitsisarnermi misigisassarsiortitsilluni angalatitsisarnerit ilaattut ingerlalluartuuvoq.

Misigisassarsiorlutik angalasut immikkut soqutigisaat

Takornariartitseriaatsip taassuma ukiuni aggersuni annertusarnissaa siunertaralugu Tunumi aallarnisaalluni suliniummit naammasseqqammersumit ilisimasanik Visit Greenland maannakkut katersuivoq.

Assiliiniartunik angalatitsinerit nunarsuarmi angalatitsisarnermi misigisassarsiortitsilluni angalatitsisarnerit ilaattut ingerlalluartuuvoq. Immikkoortumi tassani annertuumi annertusiartortumilu ingerlatsisut tassaapput suliffeqarfiit angisuut ilisimaneqartullu, soorlu National Geographic aamma Intrepid Travel, kiisalu angalatitsisartut namminersortut mikisut sullissitinullu immikkut ilisimasaqartut.

Angalasunut assiliinermik aallutaqartunut amerlanersaannut inuttut pilersitsinissamik soqutigisaqarluni angalaneruvoq angalatitsisullu isumassarsiorfiusinnaasut peqatigalugit angalanerulluni. Assiliiniarluni angalanerit misigisassarsiorluni angalanerni ilisimaneqartunik arlalinnik imaqarpoq, soorlu sammisaqarneq, piginnaasanik nutaanik ineriartortitsineq, pinngortitamik misissuineq kulturillu nutaat aammalu naligisat peqatigalugit tikiffissanut nutaanut angalaneq.

Kisiannili assiliiniarluni angalanerit assiliinissaq kisiat siunertaralugu angalanerunngillat, tassani allamik siunertaqarluni angalaneq saniatigut pilersitsiviusarluni. Assiliiniarluni tamanut tunngasumik angalanerit akerliannik assiliiniarluni angalanerit angalaqatigiinnut tunnganeruvoq, assiliisartullu ataasiakkaat pinngortitamut, kulturimut, unnukkut qilammut, uumasunut nujuartunut tunngatillugu immikkorluinnaq soqutigisaqartarput, taamaammallu tikiffissanut immikkut soqutigisatik aallunniarlugit angalasarlutik.

Kalaallit Nunaanni assiliiniarluni angalanerit killiffiat

Nunarsuarmi assiliisunik angalatitsisartut Kalaallit Nunaat aatsaat isiginialerpaat, qujanartumilli Islandimi taamatut takornariartitsisoqartareerpoq, tassani takornariartitsisartut angalatitsisartullu qeqertamut sanilitsinnukartarnikuullutik. Tamassuma takornariartut immikkoortuanni taakkunaniittut tikiffissat marluk akornanni atassuteqalernissaq naleqqunnerulersippaa.

Maannakkut takusinnaaligarput tassaavoq Kalaallit Nunaanni takornariartitsisarneq Islandimiit sunnerneqassasoq. Visit Greenland ukioq manna septembarimiit  Tunumi aallarnisaalluni suliniummut akuuvoq, tassani assiliiniarlutik takornariartartut pisariaqartitaat paasisaqarfigineruniarlugit suliffeqarfik assiliiniartunik takornariartitsisartoq ingerlalluartoq Isafold Travel aamma Tasiilami Travellodge Greenland suleqatigineqarlutik.

Tunumi Kangerlussuarmilu takuneqarsinnaalereerpoq angalaqatigiit namminneq angalasut ukiut tamaasa ikitsut tikittartut. Nunatsinnili assiliiniartunik angalatitsisarnermik aaqqissuussamik tunngaviliisoqarnikuunngilaq nunatsinnili oqaaseqaatit suliniutinit tamarmiusunit katersorneqartut takutippaat assiliisut pisariaqartitaat pitsaanerusumik malinniarlugit suliniuteqartoqanngingajattoq.

Assiliisartunik apersuinerit taakku takutippaat maannakkut immikkorluinnaasumik Kalaallit Nunaannut angalasoqartartoq, misigisassanilli taakkununnga tunngatitanik peqanngitsoq, soorlu tuluk Kalaallit Nunaannut 2013-imi tikeraartoq oqartoq:

”Isumaqarpunga assiliisunut immikkut angalanernik aaqqissuisoqartariaqaralartoq. Inoqarpoq assersuutigalugu assarnernik takusiniarlutik tikittartut tamassumalu kingorna angerlaqqillutik., aammali inoqarpoq unnuakkut nal. 22 aamma nal. 03 akornanni silamiikkusuttartunik, aammalu assiliisartunik inunnut tallimaniit amerlanerpaamik qulinut angalatitsinernik aaqqissuussisoqartariaqaraluarpoq”.

”Isumaqarpunga assiliisunut immikkut angalanernik aaqqissuisoqartariaqaralartoq. Inoqarpoq assersuutigalugu arsarnernik takusiniarlutik tikittartut tamassumalu kingorna angerlaqqillutik., aammali inoqarpoq unnuakkut nal. 22 aamma nal. 03 akornanni silamiikkusuttartunik.”

“Piffissami eqqortumi, qaamassuseq eqqortuutillugu sumiffimmi eqqortumiinnissaq pingaarnerpaajuvoq."

Tunumi aallarnisaalluni suliniummit oqaatigineqartut

Isafold Travel angalatitseqatigiit arlallit Islandimukartussaareersut Kalaallit Nunaanni periarfissanik misiliitinniarlugit aammalu Islandimi Kalaallillu Nunaanni inuussutissarsiutit immikkoortuanni suleqatinut ilisimasanik taakkunannga paarlaasseqateqarnissaq siunertaralugu Visit Greenlandimut aamma NATA-mut saaffiginnippoq.

Angalaqatigiit ulluni sisamani Ammassallup eqqaaniipput, tassani sumiiffiit arlallit tikeraalutik. Angalanermi Kalaallit nunaanni sulinermi misilittakkat pillugit oqaaseqaatinik Visit Greenland katersivoq, soorlu assersuutigalugu Ron Rosenstock USA-meersoq oqartoq:

”Kalaallit Nunaat Islandilu assigiinngitsorujussuupput, tikiffissallu taakku marluk ataatsimoortinnerat aqqutaani uniffissarpassuaqarluni angalalluarnertut misigineqassaaq. Islandimi angalanermi tikiffissat arlaliupput, Kalaallilli Nunaat avinngarusimaneruvoq pitsaasunillu unammilligassaqarfiulluni.”

Angalanerup uppernarsisippaa assiliisartut angalasunut allanut sanilliullugu nalunaaqutaq malinneq ajoraat, soorlu assiliisartoq, Geurt Besselink, hollandimioq nassuiaasoq:

“Piffissami eqqortumi, qaamassuseq eqqortuutillugu sumiffimmi eqqortumiinnissaq pingaarnerpaajuvoq. Angalaqatinnut nerisassat inissallu pingaarnernit tulliupput pingajuullutilluunniit. Ullaakkut nal. arfinernut makikkajunneruvugut, taava arfineq marluk missaani sumiiffinni pitsaasuneereertarpugut. Inuit ullup ingerlanerani qasuersaarnissamut periarfissaqartarput, tamassumalu kingorn unnukkut angalaqqittarluta. Sumiiffinni angalatitsisartut piffissani assigiinngiiaartuni sulisinnaasariaqarput."

Ilisimasanik katersuinitsinni paasivarput assiliisartut nalunaaqutaq aalajangersimasumi angalanissaq kissaatigiuaannanngikkaat. Qaamaneq silallu allanngorarnera malittarpaat, angalatitsisartullu ”qaamaneq eqqortoq malillugu pilersaarutit allanngortissinnaasariaqarpaat, ullorlu tamaat sumiiffimmi ataatsimiissinnaasarpugut, tiimialuinnarni tassaniinnissarput pilersaarutaaqqaarsimagaluartoq”, soor Wim Broekmann nassuiaasoq.

Assiliilluni angalanernerni sumiiffimmi takusassatsialaat taamaalilluni pineqarpallaanngillat, pineqarnerullutilli sumiiffinni inuit sumiiffinni angalatitsisut aalajangersimasut angalaqatigiillu pisariaqartitaannik naleqquttunik ilisimasalinnik peqateqarluni sulinissaq, tamannalu Geurt Besselinkip imatut eqikkarpaa:

“Assiliisartunit peqartoq tassaavoq sumiiffigisami misigisanik assiliinissaq, aalajangersimasunullu sumiiffinnukanngitsoorluta suna takunngitsoornerlugu nalugutsigu tamanna ajornartorsiutaanngilaq. Illuatungaanili ilisimasaqarluartumik sumiiffimmut nutaamut qaqugukku nuunnissamut ilisimasaqartumik angalatitsisoqarnissaq pitsaasuuvoq, tassa assilisat pitsaanerusut assilerusutat assinginut nutaanik periarfissiissammat”.

Suliniutissat tulliuttut

Assiliisut angalaneri Kalaallit Nunaanni immikkoortuuvoq immikkut ittoq, tamannalu soorlu aalisartunik, pinialuttunik, helikopterimik sisorartunik immikkoortullu assigisaannik aaqqissuussisarnerisa assinganik sumiiffinni angalatitsisartunit aaqqissuunneqartariaqarlutik. Tamanna isumaqarpoq assiliillutik angalaqatigiit piffissani assigiinngiiaartunik angalasarnissartik pisariaqartikkaat, takuniarneqarajuttartunukarnissaq immaqa soqutiginngikkaat, angalatitsisullu angalaqatigiinnik toqqaannartumik sullissisut ilisimasaqarluartariaqartut aammalu qaamanermik, sumiiffinnik, suliap qanoq inneranik paasissutissanik aaqqissuussinermillu paasinnissinnaasariaqartut.

Isafold Travel angalatitsisartuilu ilisimasaminnik misilittakkaminnillu Visit Greenlandimut paasissutissiilluarput, anguniarparpullu Tunumi aallarnissalluni suliniutikkut ilisimasalikkat taakku tunngavigalugit assiliiniartunik angalatitsisarnerit annertusiartortinneqassasut Kalaallillu Nunaanni tamani immikkoortumik taassuminnga pilersitsisoqassasoq.

Suliffeqarfiit angalatitsisartullu angalanermi tassani peqataasut 2015-imut angalatitsinissanut pilersaarutit suliarilereerpaat, Visit Greenlandimiillu angalatitsisartut takornariartitsinermik taassuminnga nutaamik aallartitsinissamu soqutigisaqartut tunngaviusumik ilisimasanik annertunerusunik ikiorusuppagut.

Tikiffiit, piffissat takornariartitsiviusarnerusut, sumiiffiit, sumiiffinni angalatitsisartut Tunumilu suliniut immikkut pillugu annertunerusumik paasisaqarusukkuit uunga attaveqarfigisigut photos@greenland.com.

“Assiliisartunit peqartoq tassaavoq sumiffigisami misigisanik assiliinissaq, aalajangersisunullu sumiiffinnukanngitsoorluta suna takunngitsoornerlugu nalugutsigu tamanna ajornartorsiutaanngilaq.”