Taaneqqartarput Anders Andersilu, ukiullu kingulliit arfineq marluk Pisortatut Pisortallu Tulliattut Visit Greenland aqunnikuullugu.

Taakkua nutaanik unammilligassarsiulersut qimagutinnginneranni maani sulinerat pillugu apersulaarpagut:

 

Qanoq sivisutigisumik Visit Greenlandimi sulinikuuisi?

Stenbakken: Uanga Visit Greenlandimi pisortatut aasaru ukiut arfineq pingajuat avillugu angussavakka.

La Cour: Takornariaqarnermut siunnersuisoqatigiit Greenland Tourismimi kingorna Greenland Tourism & Business Councilimik taaguuteqalersumi aallartippunga. Assigiinngitsunik suliaqartarlunga aggustimi taamaatikkuma katillugit ukiut 16'issaat avillugu sulinikuussaanga.

 

VGmi sulianni tulluusimaarutiginerpaasat?

Stenbakken: Pioneering Nation'itut nittarsaassinermik, assigiinngitsunik nioqqutissarsiornermik suliat kiisalu naatsorsueqqissaarinermik uppernarsaasiornermillu suliat imminnut kattullugit naleqqussaalluni suleriaaseq tulluusimaarutiginerpaavara. Suleriaqqinnissatinnut taakkua tunngaviupput. Taamatut suleriaaseqarneq pingaarnersiuinissatsinnut iliuuserisassatsinnillu ersarinnerusumik pilersaarusiorsinnaanissatsinnut iluaqutigaarput.

La Cour: Nalunarpoq. Takornarianermik siunnersuisoqatigiit isumassarsiullaqqilluni, inerisaarusussuseqarluni kiisalu paasissutissiilluartarluni ullumikkut sulinera, tamattalu assigiimmik anguniagaqarluta suleqatigiinnerput assut tulluusimaarutigaara. Kalaallit Nunaanni umiarsuarnik takornariartarnerup inerisarnerani immikkullu isumassarsiorfigineqarnerani, pingaarutilimmik inissisimanera aamma tulluusimaarutigaara. Takornariaqarnermik suliallit akornanni pisortatigullu allaffissornerup iluani. Kingullertut aamma tulluusimaarutigaara, takornariat nalunaarsortalernerisigut suliattalu immikkuutitaarnerisigut, Kalaallit Nunaanni takornariaqarneq pillugu ilisimasaqarnerulernermut peqataanikuunera.

 

Puiguikkiussaqarpit?

Stenbakken: Ukiut arfineq marluk VG-mi sulininni misigisat nuannersut amerlaqaat - amerlanersaat suleqatinut tunngasut. VG-mi sulineq uanga isummanni nutaaliornernik ulikkaarpoq. Sulisut sulilluartut, oqitsumik qujasaarinertalinnillu ilallugit suliaqartut. Taamaalilluni sulineq nuannernerusarpoq. 

La Cour: Pioneering Nationitut aalajangersukkamik nittarsaasarnerup aallartisarnera immikkuullarissumik pingaarutilittut isigaara. Nittarsaasseriaaseq taanna iluareqaara, nunallu massuma ilisaritinneqarnerani inunnik immikkoortitsinani peqataatitsiniaaneq assut nuannaarutigalugu.

 

Sumut nuussamaarpisi?

Stenbakken: KNImi Tuniniaanermut Pisortatut aallartissaanga. VG'mi aaliangersimasumik nittarsaanermik tuniniaanermillu suleriaaserput KNI'mi atorneqarsinnaassangatikkakku, nittarsaanermut tuniniaanermullu immikkut immikkoortortaqalernissaq suliarissavara, tamannalu suliassarujussuuvoq. Ingerlatsivik taanna inuiaqatigiinnut annertoorujussuarmik pingaaruteqarpoq, KNI'p isigineqarnerata pitsanngorsaaviginissaanut qilanaarpunga.

La Cour: Air Greenlandimi Misissueqqissaartarnermut Pisortatut aallartissaanga. Suliarisarialinnik suliaqartarnissara immaqalu takornariaqarnerup inerisarneranut allami inissillunga piginnaanikka atorluarlugit, Nunatta timmisartuutileqatigiiffiata ineriartortinnissaanut peqataanissara qilanaaraara.

Visit Greenlandimi atorfeqarnissigut inuiaqatigiinnut tapiissuteqarnersinnut, sulisut tamaasa sinnerlugit Anders Andersilu qutsavigaatsigit!