Takornarialerineq aallartilluinnalerpoq. Takornariat ilaasa Nunatta sineriaa kangerluilu qaannaniit avataasiutiniit qimerluualaarusussavaat. Kalaallit Nunaannut qajartoriartartut misilittagaqareertarput, uagulli angalatitsisartutut qaannanik attartuisarneq sungiusimavarput.

Qaannanik attartortitsisarnermut atatillugu malittarisassat eqqumaarfigaagut? 

Assersuutigalugu qajaq ilaasortaatinut naleqqussuunneqartoq ilisimaviuk. Taamaanngippat ataani allassimasut atuartariaqarunarpatit.

 

INUUSSUTISSARSIUTIGALUGU IMAATIGUT ANGALLASSINEQ

Aquttoq ilanngullugu attartoritsineq

Ilisimasortalerlugu qaannanik attartuititsineq inuussutissarsiutigalugu imaatigut angallassinertut naatsorsuunneqarluni, imatut malittarisassaqartinneqarpoq:

 

"Angallatit minnerusut 12'it tikillugit ilaasoqarsinnaasut pillugit nalunaarut"

 

"Inuussutissarsiutigalugu angallatit minnerusut kiisalu kalaallit aalisariutaat Danmarkimi Kalaallit Nunaatalu sineriaani 12'it tikillugit angallassisut pillugit nalunaarut"

 

Angallataatilik tassaavoq qaannanik piginnittoq, aquttoq tassaavoq ilisimasortaq/ilitsersuussisoq kiisalu ilaasut tassaallutik pisisartut/atuisartut.

Inuussutissarsiutigalugu angallassat (atuisartut) angallanneqarnerminni isumannaallisaasoqarluarsimanissaa naatsorsuutigisarpaat, pinartumillu ajutoortoqaraluarpat annaanneqarsinnaanissartik naatsorsuutigalugu. Taamaammat angallammik ingerlatsisup piginnaanerisigut piumasaqaateqartoqarpoq isumannaallisaanermullu ilitsersuut piareeqqasussaalluni.

 

Imaatigut sumulluunniit angalanermi pinartumik ajutoortoqartillugu ilaasut tamarmik annaanneqarsinnaanissaat aaqqissuisup qulakkiigassaraa. Tassa angallassinermi annaassiniartoqassappallu pissutsit pisortat nalilersugassarinngilaat, tamakkua angallassinermik aaqqissuisup isumagisassaraa.

 

Angallatat amerlassusaat eqqarsaatigalugu pissutsit aamma taamaapput. Malittarisassat naapertorlugit inuit 12'it tikillugit amerlatigisut angallanneqarsinnaapput, taamaakkaluartorli qajartornermik ilinniartitsisoq qaannanik 12'inik angallassisinnaasariaqanngilaq.

 

Ilaasunik (qaannanik) angallassinermik aaqqissuisup tassani aamma nalilertussaavaa, qassit ilaasorisinnaanerlugit, imaluunniit angalanissaq isumannaatsuussappat pinartumillu ajutoortoqartillugu ilaasut tamarmik annaanneqarsinnaanissaat qulakkeerniarlugu, qassinik inuttaqartariaqarnerluni aaqqissuisup nalilertartussaavaa.

 

SUNNGIFFIMMI ANGALAARNEQ

Ingerlatsisussaq ilanngunnagu attartortitsineq, qaannat/piginnittut Kalaallit Nunaanni najugaqavissut

Ingerlatsisussaq ilanngunnagu angallammik attartortitsinermi, Imarsiornermi Qullersaqarfiup/Søfartsstyrelsen sunngiffimmi imarsiorneq pillugu malittarisassai atuupput:

 

"Sunngiffimmi angallatinut kiisalu sunngiffimmi angallatinut 24 meteri sinnerlugu takissusilinnut isumannaallisaanikkut nalunaarut". (Siornatigut Imarsiornermik Qullersaqarfimmiit/ Søfartsstyrelsenimiit nalunaarutit atuuffianni).

 

Nalunaarummi tassani angallammut piumasaqaatit assigiinngitsut allattorsimaffeqarput, tamatumalu saniatigut puttaqutit annanniutit ilaasunut tamanut naammattut isumannaatsuunissaat angallammik ingerlatsisup akisussaaffigalugu. Sunngiffimmi angalanerummat isumannaallisaanissamut piumasaqaatit allat atuutsinneqarput.

 

Sillimmasiineq

Sillimmasiinissamut atatillugu inuussutissarsiutigalugu ilaasoqarluni angallassisup akisussaaffigaa, ilaasut nassataasalu sillimmaserneqarsimanissaat. Ilaasut umiarsuarmiinnerinnaanni sillimmasiineq atuutissaaq, ilaasut arlaat timaani pisuttuarluni niuni napippagu atuussinnaanani.

 

Nunami/timaani takornariat ajutoorsinnaanerannut atatillugu sillimmasiinissamut ulorianartoqarsinnaaneranullu naliliisut inissisimaneri pillugit, sumiiffimmi upalungaarsimatitat saaffigineqassapput, tamanna imarsiornermut atatillugu malittarisassiugaanngimmat.

 

Imarsiornermi Qullersaqarfiup/Søfartsstyrelsenip nittartagaani ilaasut sillimmasiinissaat pillugu annerusumik atuarsinnaavutit.

 

Kalaallit Nunaanni imarsiorneq ulorianarsinnaammat, qajartortitsinissamik qaannanilluunniit attartortitsinissamik neqerooruteqartut tamaasa kaammattorusuppagut, malittarisassat sukumiisumik paasiniarsareqqullugit.

 

Malittarisassat pillugit apeqqutissaqaruit nalorniserisaqarlutilluunniit, taava Imarsiornermik Qullersaqarfiup/Søfartsstyrelsenip Kalaallit Nunaanni immikkoortortaqarfia saaffigineqarsinnaavoq:

 

Email: nuuk@dma.dk

Oqarasuaat: +299 32 54 44

 

Aasarsiorluarisi!