Angutit taakku marluk pisarnermissut maluginiarneqaratik tammaannarusussangaluartut, qutsavigisariaqarmata pisortatigoortumik inuulluaqqorusuppagut, siunissamilu pitsaanerpaamik kissaallugit.

MADS PIHl

Mads ilaquttanilu inuunerminni misigerusutatik nutaat misigisinnaajumallugit Sverigemut nuupput. Taassuma quiasaariaasaata assiliissumminillu atuinissaminik tupinnaannartumik piginnaanera maqaasineqarumaartut oqaatigigukku, Kalaallit Nunaanni najugallit tamaasa sinnerlugit oqassagunarpunga.

MALIK MILFELDT

Nunatsinni ukiut qulit sinnerlugit takornariaqarnermik suliaqareerluni, Malik maanna annertunerusumik akisussaaffeqartussatut allamik atorfittaarpoq. Malik maanna Albatros Travelimi atorfilittut takornariat ornittagaat immikkut aallunnerusussanngorlugit, ingerlatsiviup siunissami Kalaallit Nunaat tamakkerlugu takornarianik sullissineranut sunniuteqarnerusussatut atorfinippoq. Taamaammat qujanartumik taanna takoqqinngisassatut inuulluaqqunagu oqarfigiinnassavarput; “takuss”.