Mittarfeqarfiit Visit Greenlandilu paasissutissiisarnermut mittarfinnilu kusassaanissap tungaatigut suleqatigiinnerunissamik  isumaqatigiissusiortut,

Mittarfeqarfiit Visit Greenlandillu suleqatigiinnialernerat Kangerlussuarmi misilittagarillualikkat tunngaviullutik pinngorpoq. Suliffeqarfiit taakku marluk ungasinngitsumi nunatsinnut takornarissanik tikilluaqquserpalaartussatut isumalinnik iigarsuarnik kusassaanikkut suleqatigeeqqammerput. Atsioqatigiinnikkut isumaqatigiissusiornerisigut suleqatigiinneq piumasaqaatitaqalerlunilu siunertaqalissaaq, mittarfiit arlariit kusassarnissaanik siunertaqalernermik. Isumaqatigiissutip imarissavaa suliassat aningaasartuutillu qanoq agguataarneqassanersut, kusassaareernerullu kingorna kusassakkat qanoq aserfallatsaalineqassanersut.

"Mittarfeqarfiit Visit Greenlandillu suleqatigiinnialernerat Kangerlussuarmi misilittagarillualikkat tunngaviullutik pinngorpoq..."

”Alloriarnerup taamaattup takornarissanik nunatsinnut tikittunut suut orninneqarsinnaasut qilanaarutaasinnaasunillu nittarsaassinermik aallarniineruvoq  taamaalilluni takujumaagaannut qilanaartuusereersinnaallugit...”

Kusassaanissanik pilersaarusiat akisoorsuunngillat, amerlanertigummi suliffeqarffinni pineqartuni sulisoreriikkanik sulisartussaapput. Kusassaanikkut mittarfiit takujuminartunngortinnerisa saniatigut takornarissat tikinneranni  tikitaminni alakkartersinnaajumaagaannik qilanaartusaaserlugit takusassinneqarusupput.

”Alloriarnerup taamaattup takornarissanik orninneqarsinnaasut qilanaarutaasinnaasut suunerinik nittarsaassinermik  nunatsinnut tikittunut takujumaagaannut qilanaartuusiineruvoq,” Mittarfeqarfiit avammut oqaaseqartartuat, Hans Henrik Lichtenberg taama oqaaseqarpoq. 


Alloriarnissaq tulleq tassaalerpoq Ilulissani mittarfimmi kusassaanissat arlariit pilersaarusiornissaat, siunissamilu ungasinnerusumi mittarfinni anginerusuni, takornariarpassuarnik tikinneqarnerusartuni suliassat. Suleqatigiinnikkut kusassaanissani ataasiakkaani suleqatissarsiornissaq allanik nutaanik orniginartinneqarpoq. Assersuutitut taasinnaavarput Kangerlussuup mittarfiani Air Greenlandip kusassaaqataaqqammernera.

Tanny Por, Visit Greenlandimi content manageritut atorfilik, ima oqarpoq: "Visit Greenlandimut pissusissamisoorlunilu pingaarutilerujussuuvoq kikkuugaluanilluunniit takornariaqarnikkut sullisserusuttunik suleqateqartarnissaq. Taamaakkaanni angusaqaataasinnaasunik suleqatigiissuteqarsinnaanermik periarfissanik ammaassinermik saniatigut pilersaarusiukkanik annertuunik aningaasatigullu killilersuiffiuallaanngitsunik suliaqarsinnaanermitk ammaassisarput.  Taamaammat takornariaqarnikkut suliaqartuunersut imaluunniit illoqarfimmut tamarmut kusassaanikkut ingerlatsiviunerinik apeqqusiineq ajorpoq, soorlu assersuutigineqarsinnaavoq inuinnaat suliniaqatigiit ingerlassaat Colourful Nuuk. Mittarfeqarfiit suleqatigiissutiginninnerat  qanoq suleqatigiilluarnikkut angusaqarluartoqarsinnaaneranik assersuutitsialattut taaneqarsinnaavoq."

Paasisaqarnerorusukkuit uunga saaffiginnissinnaavutit: tanny@greenland.com

"Visit Greenlandimut pissusissamisoorlunilu pingaarutilerujussuuvoq kikkuugaluanilluunniit takornariaqarnikkut sullisserusuttunik suleqateqartarnissaq..."