Ingerlaavartumik katersuisarnissamut periutsimik Visit Greenland ineriartortitsinikuuvoq.

Takornarissat amerlassusaat eqqortut paasiniarnissaat

Kalaallit Nunaanni takornarissat amerlassusaat eqqortut pigineqanngisaannarnikuupput. Ineriartortitsinissamut anguniakkani, takornariartitsinermi kaaviiaartitanik naatsorsuinerni takoqqusaaruteqartarnermilu suliniutini missingiutit maannamut tunngavigineqarneq ajorput.

Taamaammat takornarissat amerlassusaat eqqortut (WTO-p takornarissanik nassuiaanera tunngavigalugu) nunanut najugaqarfigisaannut agguarlugit ingerlaavartumik katersuisarnissamut periutsimik Visit Greenland ineriartortitsinikuuvoq. Paasissutissat Kalaallit Nunaannit nunanut tamanut timmisartunut ilaasut tamaasa nalunaarsornerisigut katersorneqartarput.

Nalunaarsuinerit 2014-imi aallartinneqarput aammalu Naatsorsueqqissaartarfik, Inuussutissarsiornermut Naalakkersuisoqarfik Mittarfeqarfiillu suleqatigalugit piviusunngortinneqarlutik.

Skærminik toortakkanik taarserneqarput

Mittarfinni nunanut tamanut aallarfiusartuni tamani nalunaarsuinermut skærmit toortakkat 2015-ip aallartinnerani Visit Greenlandip ikkussuuppai. Periuseq taanna sulisut nammineq piuminartumik, sukkasuumik ajornanngitsumillu nalunaarsuisartut qanimut suleqatigalugit ineriartortinneqarpoq.

Stregkodenik scannerutit tigummiartakkat 2014-imi julimit atorneqarnikut skærminik toortakkanik taarserneqarput. 2014-imili ukiakkut paasinarsivoq periuseq taanna piffissaataajaavallaartartoq allanngorartuullunilu. Tamassuma kinguneraa 2014-imi ukiamiit paasissutissat naammagitsuunerat, taakkulu takornarissat amerlassusaannik kissaatigineqartutut takussutissiinngitsut.

Mittarfiup suunera apeqqutaalluni nassatanik tunniussinermi imaluunniit Securitymi misissuinernut atatillugu nalunaarsuisoqartarpoq.

Mittarfiup suunera apeqqutaalluni nassatanik tunniussinermi imaluunniit Securitymi misissuinernut atatillugu nalunaarsuisoqartarpoq.

Nalunaarsuiffeqarnermi anguniagaavoq angalasut suminngaaneernerannik kisitsisinik eqqortunik pissarsinissaq.

Paasissutissat suut paasiniarneqarpat?

Inuit pillugit paasissutissat mianernartut nalunaarsorneqarneq ajorput, taamaallaat nuna najugaqarfik, mittarfik aallarfik piffissarlu nalunaarsuiffik. Nalunaarsukkat tamarmik Nalunaarsueqqissaartarfimmut nassiunneqartarput, taassanilu suliarineqartarlutik, saqqummersinneqartarlutik aammalu tourismstat.gl-imut ikkunneqartarlutik.

Nalunaarsuiffeqarnermi anguniagaavoq angalasut suminngaaneernerannik kisitsisinik eqqortunik pissarsinissaq, taamaalillunilu niuerfiit assigiinngitsut qanoq ineriartornerannik pissarsinissaq.

Nunap najugaqarfiup apeqqutigineqarneratigut Danmarkimi najugaqartut Kalaallit Nunaanni najugaqartunit tamarmik danskisut innuttaassuseqartut immikkoortinneqarsinnaapput.

Datat qanoq atorneqassappat?

Paasissutissat niuerfiit qanoq ineriartornerannik nalilersuinermut, takoqqusaarinermi suliniutit sumut sammitinneqarnissaannut sunniutaasalu uuttornissaannut tunngatillugu aammalu Kalaallit Nunaanni takornariaqarnerup aningaasatigut pingaassusianik naatsorsuinermi tunngavittut nuna tamakkerlugu nunallu immikkoortuini atorneqartarput.

Paasissutissat aamma nunap immikkoortuini assigiinngitsuni takornarissat immikkoortuinik misissuinerni paasissutissanut kiisalu unnuisartunik naatsorsueqqissaarisarnernut ilanngunneqarsinnaapput aammalu nunap immikkoortuini nunalu tamakkerlugu takornariartitsisarnermik pitsaanerungaartumik takussutissiissallutik.
Assersuutigalugu agguaqatigiissillugu atuinernik angalanermilu siunertamik nalunaarsuinerni paasissutissat tigusillattaarluni misissuinernik ingerlaavartumik ilaneqartassapput.

Annertunerusunik paasisaqarusukkuit attaveqarfigiuk: Visit Greenland, Pisortap tullia Anders la Cour Vahl, anders@greenland.com.

Paasissutissat niuerfiit qanoq ineriartornerannik nalilersuinermut ilaatigut atorneqassapput.