Sanaartukkat qaliparlaat. Illut nutartikkat. Atoqqiisarnissamut aaqqissuussat. Illit najukkanni tamakkua immaqa nalinginnaasuupput, Tiilerilaamili nutarterinissamut pilersaarut aallarnerlugu innuttaasut torersaallutillu takujuminarsaassapput.

 

Nunaqarfik avinngarusimasoq

Tiilerilaami inuit 100't najugaqarput, Kalaallit Nunaanniluunniit avinngarusimasutut taasariaqarluni. Tunumi illoqarfiit annersaat, Tasiilaq, nunaqarfimmiit 40 kilometerinik ungasitsigaaq, Sermiliup Kangerluani isikkivik allanngorarluni angeqisoq sanileralugu. Tassunga sanilliullugu Tiilerilaaq mikisuarannguuvoq.

 

Periarfissat ikiliartornerat

Avinngarusimasumi najugaqarfiit unammilligassaat Tiilerilaami aamma unammilligassaraat: innuttaasut ikiliartornerat, tamatumalu kinguneranik inuttut suliffissatigullu periarfissat ikiliartorlutik. Taamaammat Kalaallit Nunaanni nunaqarfinni minnerusuni najugaqaannartut tassaanerupput utoqqaat utoqqalinersiutiminnik inuussutillit. Innuttaasut ikiliartornerisa malitsigisaasa ilagaat illut inoqanngitsut aserfallatsaalineqanngitsullu ajornartorsiutaaneri. Ukiuunerani torinngitsut apummit matuneqaraangata alianaatsutut ittaraluarpoq, aasakkulli nunaqarfik torerpallaanngitsoq takuneqarsinnaasarluni. Eqqaavissuaq ammaannartoq qanittumiittoq aamma alianaaqutaanngilaq.

Innuttaasut suliniuteqartut

Qujanartumilli siunissami periarfissanik amerlisaanissamut takorluukkat saqqummiussorneqarput. Tiilerilaami innuttaasut pingasut ilisarititsigit; Gert, Tobias aamma Julius. Periarfissat ikiliartuinnartut isigiinnarnagit angutit taakkua najugaqarfimminni siunissami periarfissat aaqqissuussiviginissaat namminneq aallartippaat. Taakkua illunik pisoqalisunik pisiortoriarlutik, takornariat torersunik ineqartissinnaanissaat eqqarsaatigalugu, nutarterpaat.

 

Kommuneqarfimmiit Visit Greenlandimiillu taperneqarput

Takornarialli suminngaannit takkutissappat? Unnuiffissat piareeraluartut tikeraat qimussinik tikiinnariaannaanngillat. Tassuunali tassa Visit Greenland ikiuussinnaavoq. Tiilerilaap nittarsaanneqarnissaanut Nunatsinni Takornariaqarnermut Siunnersuisoqatigiit , tusagassiuteqarfinneersunik nunanilu tamani angalatitsisartunik tikeraartitsisarnikkut ikiuutissaaq. Qanorlu inooriaaseqarneq immikkuullarissoq taakkua qanimut misigisaqarfigisinnaassallugu. Sumiiffimmi takornarialerisut nunanilu allaniit takornarialerisut atassuteqarfissaattut inissisimaatigaluni Visit Greenland aamma nittarsaanissamut iluaqutissatigut, soorlu greenland.com atorlugu, suliniuteqartarnikkut ikiuutissaaq.

"Periarfissat ikiliartuinnartut isigiinnarnagit angutit taakkua najugaqarfimminni siunissami periarfissat aaqqissuussiviginissaat namminneq aallartippaat."

Visit Greenlandip pisortaa, Anders Stenbakken, oqarpoq,

 

“Tiilerilaaq inissisimavoq nunarsuatsinni alutorineqarnerpaat ilaata, Sermiliup kangerluata, eqqannguani. Ilulissat kangerlua UNESCOp nunarsuatsinni eriagisassaatitaa ukioq kaajallangajallugu takornarianit ornigarneqartuartoq, Tunumi sumiiffik manna Kalaallit Nunaanni isertugaataalluartut ilagaat. Sumiiffik tamanna immikkuullarissoq inunnit amerlanerusunit takuneqarnissaanut ikiuutaasinnaanissarput neriuutigaarput.”

 

Tamatuma saniatigut Tiilerilaami innuttaasut suliniutaat Kommuneqarfik Sermersuup tapersersorpaa. Eqqagassat ingerlaavartumik isumagineqartarnissaannut nunaqarfiullu kusassarneqarnissaanut kommuneqarfik nunaqarfimmilu aqutsisut ikiuupput. Eqqakkat ukiumoortumik umiarsuarmik assartorneqarnissaasa tungaanut, pitsaanerusumik inissiisoqartarnissaanut aaqqissuussap atuutilernissaa, taakkua atuutsilerniarpaat. Illut nunaqarfimmiunit qalipanneqarsinnaaqqullugit, kommuneqarfik qalipaatinik pilersuissaaq. Illut aserfallassimasut isaterneqassapput, toqqavii nerrivilersorlugit nasiffissatut ilusilersorneqarlutik.

Tiilerilaaq pillugu

Tiilerilaaq ungasinngitsoq tikillugu Kalaallit Nunaata Kitaani allanneqartaraluarpoq; Tiniteqilaaq. Maannakkulli Tunumiutut taaguutaa pisortatigut taaguutaalerluni. Nunaqarfik suli naalisaalluni taaneqartarpoq; Tinit.

Arriitsumik qularnaatsumilli

Suliariniagaq una iluatsissappat nunaqarfimmiut aallaqqaammut suliniutiginiagaat piviusunngortinneqartariaqarput. Nunaqarfinni aalisarnermik piniarnermillu inuussutissaqarniarneq allatigut tapertaqartikkusullugu isumalluartoqarpoq. Nunaqarfinni inuusuttut Nunatsinni allamut nuuttariaqaratik nunaqarfimmiiginnarnissaat taamaalilluni periarfissinneqassaaq.

Takornarianik sullissisartut tusagassiortullu 2017'imi apriilimi Tiilerilaaq tikeraarpaat. Taakkua aamma Tobias naapippaat oqaluttuartillugulu. Visit Greenlandip aamma videoliortartumik ilaatitaqarput. Illut siulliit aasaru qalipanneqarnissaat pilersaarutaavoq, ukiullu ingerlanerani eqqaavissuaq kommuneqarfimmit imaarneqartussaalluni. Arriitsumik qularnaatsumilli kusassaasoqassaaq.