Tuniniaanissamik nittarsaassisarneq aamma nalunaaqutsersuisarneq pillugit inatsimmi nutaami ilanngunneqanngitsut pillugit aalajangersagaq kinguneqarpoq takornariartitsisarnermik inuussutissarsiutillit sullississutinik tuniniaanissamik nittarsaassisarneranni oqaatsinut piumasaqaatit takornariartitsisarnermik inuussutissarsiutilinnut killeqartumik sunniuteqassasut.
 
Tuniniaanissamik nittarsaassisarneq aamma nalunaaqutsersuisarneq pillugu inatsisissaq nutaaq Naalakkersuisut tamanut ammasumik januarimi 2015-imi tusarniutigaat. Inatsit suli akuerineqanngilaq, ilimagineqarporli Inatsisartut 2015-imi upernaakkut ataatsimiinneranni ilanngunneqassasoq, tassungalu atatillugu takornariartitsisarnermik inuussutissarsiuteqarnermik soqutigisaqartut arlallit inatsisip inuussutissarsiummut atuunnissaa pillugu apeqquteqarnikuupput.
 
Takornariartitsisartut assigiinngitsut kingunerisinnaasaanik ernumanermik oqariartuutigisaat pillugit Visit Greenlandip Inuussutissarsiornermut, Suliffeqarnermut Niuernermullu Naalakkersuisoqarfik oqaloqatigaa.
 
Tamanut nittarsaassisarnermi piumasaqaatit sukaterneqarnerat inatsimmi ataatsimut isigalugu erseqqissarneqaraluartut malittarisassat sakkukillillugit ilaatigut takornariartitsisarnermik inuussutissarsiuteqartut atuisinnaanerat inatsimmi § 8, imm. 4 naapertorlugu periarfissaqarput, tamannalu inuussutissarsiummik ingerlataqartunut soqutigisaqartunullu amerlasuunut soqutiginassaaq.
 
Paragraf 8 imatut oqaasertaqarpoq:
 
§ 8. Ussassaarineq, allagartalersuineq aamma inini tamanit orninneqarsinnaasuni tuniniaanissamik nittarsaassineq aamma kalaallisut pissaaq, taamaattoq takuuk imm. 2-5. Tuniniaanissamik nittarsaassinermi tapertatut oqaatsit allat atorlugit pisinnaavoq.
 
§ 8, imm. 4-mi atuutitinnginnissamut aalajangersagaq tassunga atavoq, taannaavorlu nittarsaasarneq pillugu takornariartortitsisarnermik inuussutissarsiuteqartut atuutilersitsinissaannut pingaaruteqartoq:
 
“Imm. 4. Imm. 1-imi oqaatsinut piumasaqaat, tuniniaanissamik nittarsaassinerup oqaatsinut piumasaqaatip naleqqutinngitsumik pisariusorujussuarmik pisoqanngippat naammassineqarsinnaanani pinerani imaluunniit oqaatsit allat atorneqarnerat pissusissamisoorpat, atuutissanngilaq.”
 
Tamanna isumaqavippoq suliffeqarfiup nittarsaanera oqaatsit allat atorlugit, assersuutigalugu kalaallit oqaasii atornagit, pissusissamisoornerusumik ingerlanneqarsinnaanersoq inuussutissarsiuteqartut siullermik namminneq nalilersussagaat. Inuussutissarsiuteqartutulli eqqumaffigineqassaaq najugaqarfinni pisisartunut tamanut nittarsaanermi § 8, imm.4 atorsinnaagunanngitsoq.
 
Tamassuma saniatigut inatsimmi paragrafimut tassunga oqaaseqaatini ersippoq oqaatsinut piumasaqaatit suliffeqarfiup nammineq iniutaanni atuutinngitsoq. Allatut oqaatigalugu suliffeqarfiup suunera pineqarnersoq apeqqutaatinnagu suliffeqarfiup iniutaani oqaatsit atorusunneqartut atorneqarsinnaapput.
 
Takornariartitsisartutut inatsisip kingunissai pillugit annertunerusumik apeqqutissaqarussi Visit Greenlandimut una atorlugu attaveqarnissamut tikilluaqqusaavusi info@greenland.com.