“Kalaallit Nunaat massakkut tuniniarnerussallugu qilanarpunga!”

ANGALATITSINERMIK TUNINIAASUNIK ANGALATITSINEQ TOQQARTUMIK OQAATIGALUGU

2016-imi augustip aallartilaarnerani, Europami takornariaqarnikkut tuniniaasartut arfineq-pingasut Ilulissanut angalapput, Air Greenland’ip aqqutai marluk– aqqut København / Kangerlussuaq qangali pioreersoq aammalu Keflavikimiit timmisartukkut toqqaannartumik aqqut aasaq manna atuuleqqaartoq atorlugit.

Unnuit tallimat ingerlanerini, Visit Greenland peqataasunik tikeraartitsisuuvoq Qeqertarsuup Tunuata angallammik matoqqasumik angallaviginerata – Qasigiannguani, Aasianni Qeqertarsuarmilu, ilanngullugit Ilulissani ulloq siulleq kingullerlu unnuinertaqartumi – nalaani.

Sapaatip akunnerata taassuma iluani sammisaritinneqartut iluiniillupput arfernik qaninngoorinninneq, sumiiffinni ilaqutariinnik nereqateqarneq, Kalaallit Nunaanniit ussigassat immikkoorutillit, nunakkut pisunneq, qajariarneq, illoqarfimmi takusassarsiorneq, soorunalumi aamma immakkut angalaneq, kiisalu unnuisarfinni najugaqartarluta pitsaassutsikkut oqqiffinniit unnuisarfiit inoroorsaarfiutiigisut sisamanik ullorialikkanut.

PISSARSIAQAATIT ANNERTUUT TAALLIMAT ANGERLAANNEQARTUSSAT

1. Qeqertarsuup Tunua arfernik naammattuugassarsiorfissuuvoq. Ullut sisamat ingerlanerini, qipoqqaat tikaagulliusaallu takuagut. Tamatumunnga ilaatigut peqqutaavoq immakkut angalanermut piffissaq annertooq atorneqarmat – missiliorlugu katillugit akunnerit arfineq-pingasut – aammalu Qeqertarsuarmi qipoqqaat pinnguarnermi, nerinermi, nalunnermi erinarsornermilu nalaani nunamut taama qaninngoortiginerat.

Angallassisunut siunnersuut: Suliffeqarfigisannut naapertuutsillugu, arfernik naammattuuinissamut periarfissat erseqqissakkit, saniatigullu eqqaamallugu uumasut nujuartat pineqarmata, taakkunanngalu takunninnissaq qulakkeersimaneqanngimmat.

2. Inuit immakkut angalarusupput. Naak immakkut angalanermut uagutsinnik “assartuinerinnaagaluartoq”, tamanna imminik pissanganartumik peqataasunut misigisassarsiorneruvoq. Taamatullu illoqarfiup tikikkiartornera ilutigalugu erseqqissiartornera aammalu tulattarfianut anngunneq, ilisimasassarsiorluni angalasutut misiginermik pilersitsilluni.

“Kitaata sineriaani pinngortitamik aatsaat taama kusanartigisumik pissangartigisumillu Qeqertarsuarmi takuvunga.”

“Kalaallit Nunaannut angalaneq kaammattuutigivallaalersinnaangilara. Tupinnarluinnarpoq!”

3. Nunap immikkoortuatut Qeqertarsuup Tunua misigisassarsiornerup ilorrisimaanerullu akulerunnissaannut piukkunnartuuvoq. Illoqarfiit nunaqarfiillu tamarmik immikkooruteqarlutillu tunniussassaqarput, angalasut assilissatut ilivitsunngortikkiartuaarsinnaasaat, angalanermi ataatsimi sumiiffiit arlaqartut tikinnerisigut. Angalapallalaarnerup iluaniilluni Qeqertarsuarmi nunakkut pisunneq unnuamik marlunnilluunniit Ilimanami angerlarsimaffiit arlaanni qasuersaarfeqarluni immikkorluinnaq issaaq. Imaluunniit kujammut Aasiannut qajarissanik attartoriartorluni ornigutinnginnermi, neriniartarfik Mamartut’ni kalaallit nerisassaataannik misiliiniarluni Ilulissaniinneq misigisassarsiornermik misinnartoqarpoq.

Angallassisunut siunnersuut: Suleqatigiigitsi, tassuunakkut neqeroorutisi uiguleriisillugit immikkoortuisalu, ilissi immikkut ingerlatassi, nukittuffii inerisarsinnaajumallugit, saniatigullu assigiimmik tikeraartoqarneq pissarsiaqarfigalugu.

“Sumiiffiit allat arfernik naammattuugassarsiorfissuartut pingaarnertut imminnut taasarput, kisianni [Qeqertarsuup Tunua] immikkuullarilluinnartuuvoq peqqutigalugu sineriaqarmat qarsuusunik, immami ilulissat arferillu – illinnuinnaq takoqqusutut ittut. Allanik inoqanngilluinnartumi!”

4. Sapernassutsimik paasinninneq inummiit inummut allanngorarpoq. 

Kalaallit ilaasa qaqqani eqqissisimasumik pisuttuarnertut misinnartitaat, tikeraap Tuluit Nunaanneersup aatsaat taama timikkut misilinneqarnertut misigisinnaavaa. Peqataasut timikkut piginnaasatigut nikingassusaat misilittagaallu assigiinngiiaartorujussuupput 30-kkunni 40-kkunnilu ukiullit eqqarsaatigalugit. Takorluulaariarullu nikingassut qanoq annertutigisinnaanersoq 40-kkunni, 50-kkunni 60-kkunnilu ukiullit eqqarsaatigalugit.

Angallassisunut siunnersuut: Tunisassiavit sapernassusaat allaaseritillugu – soorlu nunakkut pisunneq – sapinngisamik kisitsisit atorlugit paasissutissiigit. Eqqaajuk nunap pisuffissap isorartussusaa km-inngorlugu aammalu qummut qanoq qaffariaateqarnersoq.

5. Qeqertarsuup Tunuani, Ilulissat avataanni, periarfissat annertoqaat. 

Ullumikkumut tuniniaasut Ilimanamik, Qeqertarsuamik Oqaatsunillu suli neqerooruteqanngitsut tamarmik oqaatigaat ”ilimanaateqarluartumik” sumiiffiit taaneqartut neqeroorutiminnut ilanngunniarlugit. Aammalu tuniniaasut Qasigiannguanut Aasiannullu angalanernik suli neqerooruteqanngitsut affaasa oqaatigaat sumiiffiit taaneqartut neqeroorutimittut ilanngunnissaat ”ilimanarsinnaasoq”.

Disko Bay’imi Angalatitsinernik tuniniaasunut Angalatitsineq

  • Ullut: 2.-7. August 2016
  • Siunertaq: Ilulissanut timmisartukkut assartuussisinnaanerup annertusineranik iluaqutissanngortitsiniarneq, tassuunakkut Qeqertarsuup Tunuata sinneranut takornarissat sunniutaat siammartersinnaajumallugu
  • Illoqarfiit nunaqarfiillu tikinneqartut: Ilimanaq, Qasigiannguit, Aasiaat, Qeqertarsuaq, Oqaatsut aamma Ilulissat
  • Tunianiaasutut peqataasut amerlassusaat: 8
  • Tuniniaasut nunat aallaavii: Tuluit Nunaat, Tyskland, Island, Holland, Frankrig aamma Danmark

Tuniniaasut nuannarinerusaat…

  • Misilittakkat: Qeqertarsuarni Kuanninut pisuttuarneq (SikuAput suleqatigalugu)
  • Nerisaqarneq: Qasigiannguani Hotel Diskobay – kapisilik pujuugaq siuleqqiutitut, nerisatut pingaarnertut neqqarinneq siataq pupinnik miseqqigaq, paarnanik kinguleqqiusiaq
  • Unnuisarfik: Aasiaat Umiartortut Angerlarsimaffiat

QITIULLUINNARPOQ SUMIIFFINNI SULEQATIGIINNERUP ATAAVARTUUNISSAA

Qeqertarsuup Tunuani angalatitsinernik tuniniaasunik angallassineq akimmiffeqanngitsumik naammassineqarpoq, Visit Greenlandip, Air Greenlandip, Qaasuitsup Kommuniata sumiiffinnilu angallassinernik neqeroorutillit 14-it iloqarfinni nunaqarfinnilu arfinilinneersut akornanni suleqatigiikkusussuseqarallartillugu.

Pilersuinermi suliassaqarfiit tamarmiusut immikkoortuisa iluini soqutigisaqartutut ataatsimut suleqatigiinneq pisariaqarpoq suliniut taama annertutigisoq kivissinnaassagaanni, tamannalu pillugu Visit Greenland qujassutissaqarpoq. Qilanaaraarput taama pissuseqarneq Kalaallit Nunaat tamakkerlugu siammarsarnissaa, tassuunakkut tamatta takornariaqarneq kivitseqataaffigisinnaajumallugu.