Floridami Fort Lauderdalemi umiarsuarnik takornariaqarneq pillugu ukiumoortumik saqqummersitsineq, Seatrade Global, ukioq manna kingumut nunani tamanit angalatitsisartunit umiarsuaatilinnillu ornigarluarneqarpoq. Saqqummersitsisut pisiniallu peqataapput. Saqqummersitsisut takornariagassanik nittarsaasut pisisartut ornitassanik allallu nioqqutissat; umiarsuarnik takornarianut nioqqutigisinnaasatik qimerloorpaat.

Kalaallit Nunaanniit suliffeqarfiit peqataasut tassaapput: World of Greenland Arctic Circle, Royal Arctic Line, Blue Water Shipping Nuuk kiisalu umiarsuarni ilisimasortaatitsinermut suliaqarfik Greenland Pilot Services. New Foundland/Labradorimeersut ukiut pingajussaannik tuniniaaffimmik avitseqatigineqarmata, St. Johnsimeersut najuupput.

Ullaakkorsiornermi ataatsimiinneq

Saqqummersitsineq aallarnerlugu CINAp, Cruise Islands of the North Atlantic'ip, aaqqissugaanik ullaakkorsiornertalimmik ataatsimiittoqarpoq, taanna tassaavoq Orkney'p Qeqertaasa, Savalimmiut, Islandip, Kalaallit Nunaata kiisalu New Foundlandip/Labradorip akornanni suleqatigiiffik, ukiut qulissaanik saqqummersitsinerup nalaani, akunnerit aappaat avillugu ullaakkorsiuutigaluni takornariartaatinik umiarsuaatillit attaveqarfigisat inuppalaartumik naapinnissaannut periarfissiisoq, 30t miss. peqataaffigineqartumik.

Naalakkersuisoq Vittus Qujaukitsoq, Nunatsinni sila pissutigalugu apuutinngitsoortoq sinnerlugu, immikkoortortaqarfimmi pisortaq Tina Amondsen oqalugiarpoq, qeqertat aaqqissueqattaasut suleqatigiinnerat kiisalu CINAmi ilaasortat umiarsuarnik takornariartitsisarnerminni iluaqutigisinnaasaannik Kalaallit Nunaanni pilersaarutaasut sammillugit:

Qaaqqusat ilaata Holland Americameersup kalaallinut paasissutissiissutigaa, takornariartitamik akornanni qanoq iluarusutsiginerannik misissuinermi, pitsaanerpaaq 10'usoq, Qaqortumut takornariat iluarusunnertik 8,7'itut nalilersimagaat, taamaammallu Qaqortumiinnertik assut iluarusunnartissimagitsik takutillugu.

Saqqummersitsinermi misigisat

Saqqummersitsinermi ulloq siullermi kalaalli peqataasut nipaarrajussinnarlutik, ullup aappassaani qimmapput. Ataatsimeeqattaarnerni paasinarsivoq, takornariartitsisartut nutaat kiisalu nalunngeriikkagut (umiarsuaatillit siornatigut Kalaallit Nunaannut takornariartitsisarnikut) ukiut marlussuit ingerlaneranni takkukkiartoqqilissasut. Umiarsuaatillit sorliit takkuttassanersut ajoraluartumik suli oqaatigisinnaanngilarput, kisianni Issittumi imarsiornermut piumasarineqartut nutaat naapertorusullugit, umiarsuit arlallit sananeqassamaarput.

Greenland Pilot Services umiarsuit Kalaallit Nunaanniinnerini ilisimasortaatitsinermik neqerooruteqartut siullerpaamik peqataaneranni, Jakob Nordstrøm imatut oqarpoq:

”Ataatsimut isigalugu isumaqarpunga saqqummersitsinermi pisisartutta allallu soqutiginnittut naapinnissaannut immikkuullarissumik periarfissaqartugut. Kalaallit Nunaanniit sinniisuutitat nunanilu sanilitsinni takornariartitsisartut, uagut Kalaallit Nunaanni aammali Issittumi sanilitsinni takornariaqarnermik suliallit isumasioqatigineri inerisaanissatsinnut isumassarsiornermut pingaaruteqarput.”

Siunissami saqqummersitsisarnissanut peqataasarnissatsinnut qilanaarpugut, taakkunanilu Kalaallit Nunaanni angalatitsinermi pissutsit assigiinngitsut pisisartunut paasissutissiissutigisarnissaat annertunerusumik sammisassavarput. 


- kiisalu Royal Arctic Line'imiit Nivi L.H. Abelsen imatut oqaluttuarpoq:

”Ullumikkut sullittakkatta siunissamilu sullissinnaasatta inuttut naapinnerat, suliallu pillugit ilaasa nersualaarinerat nuanneqaaq. Alapernaaserlutik aqqusaartartut arlaqarput, soorngunalumi neriuppunga umiarsuaatillit amerlanerit Kalaallit Nunaannut takornariartitsisalernissaminnut soqutiginninnerulissasut.”

Seatrade Globalimit nalunaarutit naapertorlugit, umiarsuarnik takornariartitsisarnerup ingerlalluarnera ukiuni tulliuttuni pitsanngoriartortuassaaq.

Aappaagu Seatrade Global ulluni 6. – 8. marts 2018 Fort Lauderdalemi ingerlanneqassaaq

Jesper Øraker BWS'imeersoq, Jakob Nordstrøm Greenland Pilot Services'imiit, Henrik Manø Greenland Pilot Services'imiit, Tina Amondsen Inuussutissarsiornermut Naalakkersuisoqarfimmeersoq, Nivi L.H. Abelsen RAL'imeersoq, Jørgen Larsen World of Greenland Arctic Circle'meersoq kiisalu Mads-Daniel Skifte Visit Greenland'imeersoq

Annertunerusumik paasissutissat Mads-Daniel Skifte uani mailikkut saaffigalugu pineqarsinnaapput: mads@greenland.com