Umiarsuarnik takornariarneq pillugu ulluni 26.-27, maj workshoppi.

Visit Greenland Kalaallit Nunaanni umiarsuit atorlugit takornariartitsisartunut umiarsuarnik takornariarneq pillugu ulluni 26.-27, maj workshopertitsivoq.

Siunertaq pingaarneq tassaavoq umiarsuit atorlugit takornariartitsinerup ineriartortinneqarneranut sinakkutaasumik atugassaritinneqartut nutaat saqqummiunneqarnissaat, pingaartumik akitsuutit, attaveqaatit, imarsiornermi isumannaallisaaneq pillugit aammalu siunissami suut periarfissaanersut oqallisigineqarnissaat.

Akitsuutinik appaaneq

Umiarsuit atorlugit takornariartitsinermi ilaasunut akitsuut ilaasumut ataatsimut 535 kr.-iusoq talinnermi ataatsimi bruttotonsimut akitsuutinngorlugu allanngortinneqarnera Inatsisartut upernaakkut ataatsimiinnerminni akueraat. Akitsuutip nutaap kingunerissavaa akitsuutit 74 %-i tikillugu sipaarutaanerat taamaalillunilu umiarsuaatileqatigiiffinnut mikinerusunut annertuumik aporfiujunnaassalluni. Akitsuut nutaaq ukioq manna 1. juni atuutilereerpoq, ilimagineqarlunili umiarsuaatileqatigiiffinnut aatsaat siusinnerpaamik ukiut marluk-pingasut qaangiuppata sunniuteqassasoq, tassa umiarsuaatileqatigiiffiit piffissaq pilersaarusiortarfiat sivisusarmat.

Timmisartut attartukkat atorlugit takornarissanik timmisartuussisarnermut akiitsuutit qaffasittut, assersuutigalugu ilaasunik taarsiinermi timmisartut atorlugit angallassinermi nalinginnaasumik ilaasunik angallassinermit qaffasinnerusumik akitsuusiisarneq aamma atorunnaassaaq. Kalaallit Nunaanni ilaasut amerlanerit taarserneranni aningaasartuutit taamaalilluni siunissami appasinnerulissapput.

Akitsuut nutaaq ukioq manna 1. juni atuutilereerpoq.

Immami angalannermut nunat tamat akornanni suleqatigiiffik (IMO) issittumi imartani – tassunga ilanngullugu imartami Kalaallit Nunaata oqartussaaffigisaani.

Imarsiornermut malittarisassat nutaat

Immami angalanermut nunat tamat akornanni suleqatigiiffik (IMO) issittumi imartani – tassunga ilanngullugu imartami Kalaallit Nunaata oqartussaaffigisaani - immakkut angallannermut nunat tamat akornanni malittarisassiorpoq, ilimagineqarporlu taakku 2017-imiit atuutilersinneqassasut. Kalaallit Nunaanni immakkut angalannermi oqartussat tamanna malillugu Kalaallit Nunaanni imarsiornermi malittarisassanik erseqqissaallutik nalunaarummik suliaqassapput. Attaveqarnermut Naalakkersuisoqarfik ilisimatitsivoq ilaatigut umiarsuit qanoq angitigisut avannarpasinnerpaami angalasinnaanerannik siunnersuuteqartoqartoq aammalu imartat ilaanni minnerpaamik umiarsuit sikumut illersuuteqarnissaannut piumasaqaateqartoqassasoq. Ilimagineqarpoq nalunaarutissaq 2015-imi ukiakkut inaarutaasumik tusarniutigineqassasoq.

Ilisimasortaqartarneq pillugu inatsisip ilaata Inatsisartuni akuerineqarneratigut ilimagineqarpoq ilisimasortaqartarnermik aaqqissuussineq piffissami qaninnermi atuutilersinneqassasoq.

Ingerlatsisunit arlalinnit erseqqissarneqarpoq, malittarisassat nutaat ingerlatsinermi aningaasatigulluunniit annertuumik kinguneqartussat umiarsuaatileqatigiiffiit aaqqissuussisinnaaniassammata piffissamik naammattumik sivisussusilimmik nalunaaruteqarluni atuutilersinneqartarnissaat pingaaruteqartoq.

Attaveqaateqarnermi pitsannguutit

Talittarfeqarnermut  immikkoortumut pilersaarummi nutaami inassuteqaatigineqarpoq, nunaqarfinni talittarfiit nassiussanik ilaasunillu angallassinermut atorsinnaanngortillugit nutarneqassasut. Taamaaliornikkut umiarsuit takornariartaatit ajornannginnerusumik ilaasunik ikaartitsisinnaalissapput. Nuummi talittarfik nutaaq Kangerlussuarmilu talittarfimmut pilersaarutit aamma saqqummiunneqarput. Kangerlussuarmi talittarfeqarnermi ilaasunik taarsiinerit annertuumik ajornannginnerulersinneqassapput, taamatut Qeqqata Kommunia talittarfinnillu ingerlatsisut naliliipput.

Peqataasut arlallit uparuarpaat sumiiffinni arlalinni ikaarussisarnermi pissutsit ajortut unammillerfissaqartut; niusarfiit puttasut nungullarsimasut mikivallaartullu aammalu umiarsuit siulliit tikinnginneranni niusarfiit puttasut ikkunneqarsimanerannik nalornissuteqartarneq.

Nuummi talittarfik nutaaq Kangerlussuarmilu talittarfimmut pilersaarutit aamma saqqummiunneqarput.

”Kalaallit Nunaanni qajartorluni misigisassarsiortarneq takutitsinerinnaanngilaq ilaasut isiginaartagaat. Sooq ilaasut qajartoqatigisinnaanngilagut?”

Sullississutinik ineriartortitsineq

Oqartoqaraangat ”umiarsuarnut ilaallutik takornariat” arnat utoqqasaat tungujortunik nujallit amerlasuut ingerlaannarlutik immaqa eqqaasarpaat, Visit Greenlandilli takornarissat immikkoortuinik misissuinerani paasinarsivoq pissutsit assigiinngiiaarnerusut. Ilisimasassarsiornermili umiarsuarni ilaasut umiarsuarni takornariartaatini ilaasunit nunami misigisassarsiorlutik takornarissat assigineruaat.

Ataatsimut isigalugu inuussutissarsiutit immikkoortuanni ilaasut inuusunnerit amerliartuinnarput, sammisaqarnerusarlutik misigisassanillu peqataaffigisinnaasaminnik ujartuinerusarlutik. Ilisimasassiornermi umiarsuarni mikinerusuni ilaasunut tamanna annertunerusumik atuuppoq, kisiannili Kalaallit Nunaanni umiarsuarni takornariartaatini taamaattoqaleriartortoq takuneqarsinnaavoq.

”Kalaallit Nunaanni qajartorluni misigisassarsiortarneq takutitsinerinnaanngilaq ilaasut isiginaartagaat. Sooq ilaasut qajartoqatigisinnaanngilagut?” Line Overgaard Hurtigruten-imeersoq aperivoq.

Sullississutit pitsaassuserlu Kalaallit Nunaanni ukiuni qulini kingullerni pitsanngoriartorujussuusimasut malugineqarpoq, kisiannili ingerlatsisut ataasiakkaat tikiffiillu umiarsuarnut ilaallutik takornarissat tikittartut sunik misigisaqarusuttarnerannik paasisaqarnissaat suli pisariaqartinneqarpoq – aammalu taakkununnga naleqqussakkanik sullississutit ineriartortinneqarnissaat eqqarsaatigisariaqarlugu.

Takorluukkat imaannaanngitsut...

Workshoppi naammassillugu ualikkut peqataasut Kalaallit Nunaanni umiarsuit atorlugit takornariartitsisarnermi takorluukkatik suleqatigiiaarlutik ilusilersorpaat, taakkulu angunissaannut pisariaqartunik pingaarnernik tikkuussillutik.

Takorluukkat tassaapput umiarsuarnut ilaallutik takornarissat ullumikkornit amerlanerulernissaat kisiannili aamma ineriartortitsisoqartariaqartut, taamaalilluni sumiiffiini aningaasatigut nalinik malugineqarsinnaasumik pilersitsisoqassalluni aammalu avatangiisini inuillu atugaanni imminut nappassinnaasumik ineriartortitsisoqassalluni. Tamassuma angunissaanut inerniliisoqarpoq immikkoortumi politikkikkut suliniutit imminut atasariaqartut, inatsiseqarnermi inuussutissarsiutit immikkoortuanni piffissat pilersaarusiorfissat isiginiarneqartariaqartut aammalu ineriartortitsinermut ajoqutaanngitsumik atassuteqarnermi sinaakkusiisoqartariaqartoq. Aammattaaq tikiffinni suliamik ingerlatsilluarsinnaalernissaq pingaaruteqarpoq, taamaalilluni sullississut sumiffinnut umiarsuaatileqatigiiffinnullu naleqartitsilersut ineriartortinneqassallutik.

Workshopimi saqqummiunneqartut paasissutissallu annertunerusut pissarsiariniarukkit attaveqarfigiuk Mads-Daniel Skifte, mads@greenland.com imaluunniit Anders la Cour Vahl, anders@greenland.com

Takorluukkat tassaapput umiarsuarnut ilaallutik takornarissat ullumikkornit amerlanerulernissaat, kisiannili ineriartortitsisoqartariaqarpoq.