VNTM 2014-imik nalilersuineq

Vestnorden Travel Mart Kalaallit Nunaanni takornariartitsisarnermik inuussutissarsiuteqartunut amerlasuunut ukiumoortumik inuussutissarsiortunik allanik niueqateqarnissamut pingaarnerpaajugunarpoq, taamaattorli VNTM 2014-ip peqataasorpassuarnut piumasaqaateqarfiulernera ilisimaneqarpoq.

Nalunaaruteqartut 40%-ii (pisisut/saqqummersitsisut Kalaallit Nunaanneersut Danmarkimeersullu) Visit Greenlandip misissuinerani akissuteqartut naliliipput saqqummersitsinermi ”ilimagisatik eqqortinneqanngitsut”, pingaartumik pisisut saqqummersitsisullu akornanni pissutsit oqimaaqatigiinnginnerat pissutaalluni.

Unammilligassaq pingaaruteqartoq taanna siunissami iliuuseqarfigineqartariaqarpoq. Taamaattorli VNTM 2014-imi Kalaallit Nunaannut takornariarnissamik tuniniaasartut nittartakkami Greenland.com nutaami nutaanik paasisaqarsinnaalerput, takoqqusaarinermilu sakkussat akeqanngitsut tamanit pissarsiarineqarsinnaalerput. 

NATA pitsanngorsaanissamillu suliaqarneq

Ukioq manna saqqummersitsisut pisisumut ataatsimut 2,5-inik amerlanerummata saqqummersitsisut amerlasuut pisisartorisinnaasaminnik naapitsinissaat killeqarpoq, tamassuma saniatigut peqataasussatut toqqarneqartut nalinginnaasumik peqataasartut amerlanernit aamma isiginiarneqarpaat.

Then North Atlantic Tourism Association-imi siulersuisut Vestnorden Travel Mart-imi unammilligissat ilisimaaraat. Siulersuisut ataatsimiinnissaanni tulliuttumi sukannernerusumik ingerlatseriaaseqarnissaq oqaluuserineqassaaq, siunissamilu saqqummersitsisarnissani nutaanik anguniagassiisoqassalluni.

Peqataasussat toqqarneqarneranni sukannernerusumik periuseqartoqassaaq, pisisartut saqqummersitsisullu akornanni pissutsit assigiinnginnerat annikillisinniarneqassalluni kiisalu niuerfiit pingaarnerit isiginiarneqassallutik.

Visit Greenland aamma Vestnorden Travel Mart

Pitsaasuuvoq ukioq manna Vestnorden Travel Martimi pitsanngoriaat pingaarneq tassaammat saqqummersitsisut akornanni inuussutissarsiornermik ingerlataqartut akornanni ataatsimeeqatigiinnerit aallartinneqarmata, tamassumani pisisartut – saqqummersitsisut akornanni pissutsit assigiinnginnerujussuat annikillisinneqarpoq.

Ataatsimiinnerit taakku Kalaallit Nunaanni takornariartitsisarnermik ineriartortitsinermi suleqataasut pingaarnerit kalaallit, danskit islandimiullu ataatsimut aallaaveqarnissaat Visit Greenlandimut periarfissiipput.

Nittartagaq nutaaq, takoqqusaarinermi sakkut nutaat

Greenland.com-ip atornissaanik nutaarpassuarnik tulluarsagaasup aammalu tuniniaasartut suleqatillu nittarsaanermi sakkussaasa saqqummiunneqarnissaanut Vestnorden Travel Mart periarfissiilluarpoq.

Sakkussat taakku pingaartumik Kalaallit Nunaata sullississutillu tassunga attuumasut takoqqusaarutiginerannut ineriartortinneqarnikuupput. Takoqqusaarinermi sakkussat nutaat Visit Greenlandimit saqqummiunneqartut akornanni periarfissat ataatsimoortut akeqanngitsut nassaassaapput.

Tuniniaasartut maannakkut assit, oqaasertat videollu sullississutinut, nunap immertuukkuinut, illoqarfinnut tuniniaaffigineqartartullu immikkoortui ilanngullugit niuernermi atortussanik pissarsinissamut periarfissaqalerput. Imarisai taakku ukioq tamaat pissarsiarineqarsinnaapput siunertaallunilu takoqqusaarinerit imarisaat naleqquttut suliarineqarnissaat siammerneqarnissaallu.

Oqaasertat, assit videollu Kalaallit Nunaata takoqqusaarutiginerat tunngasut aamma/imaluunniit nutaarsiassani,naqitani nittartakkaniluunniit niuernermi suliniutini tamani atorneqarsinnaapput.

Saqqumilaarnissamut periarfissatsialaat

Imarisaat sakkullu amerlasuut Visit Greenlandim it suliarineqartut saniatigut, immikkorluinnaq ittumik takoqqusaarutit atorlugit saqqumilaarnissamut periarfissat nutaat greenland.com-imi neqeroorutigineqarput. Nittartakkamik qaammammut takusisartut 80,000 sinnertarmatigit pisisartuulersinnaasunut soqutiginnittunut amerlasuunut takoqqusaarisarnermi taakkulu naleqqutunik imaqarnissaanni greenland.com pingaaruteqarpoq. Inuit greenland.com-imik takunnittartut nunamik soqutiginnittuupput aammalu paasissutissanik neqeroorutinillu pissarserusuttartorujussuullutik. Takoqqusaarinissamut periarfissat nutaat taakku VNTM-imi peqataasunit Kalaallit Nunaannik niueqateqartartuni paasineqarput. Inuussutissarsiortut akornanni ataatsimiinnerit takoqqusaarutigut 60 %-imik annertusisippaat.

greenland.com takornariartitsisartutta suleqatittalu saqqumilaarnissamut periarfissaqarnermik neqeroorfiginissaat siunertaralugu ingerlaavartumik pitsanngorsarneqartarpoq. Ataatsimiinnernik, nalunaarusianik nalilersuinernillu nangitseqqiinerit sullississutigut neqeroorutigullu pisariaqartitannut naleqquttuunissaat qulakkeerniarlugu piviusunngortinneqassapput.

Takoqqusaarinermi atortunut akeqanngitsunut ilitsersuut pissarsiarerusukkukku imarisaanilluunniit akeqanngitsumik pissarsiniarlutit nittartakkamut iserusukkuit imaluunniit takoqqusaaruteqarnerni periarfissat pillugit suleqataarusukkuit una attaveqarfigiuk idrissia@greenland.com.