Ukioq manna VNTM – 30-ssaat – Savalimmiuni Torshavnimi ingerlanneqarpoq – naak ullormi pisortatigoortumik ammaanersiornermi Streymoy-imi pujoraluartoq sialualaarlunilu (aaqq.: nunami qeqertarpassuaqartumi qeqertat anginersaat Torshavnillu inissisimaffia), isumalluarneq Kalaalillu Nunaannit peqataasut 30-t missaaniittut Atlantikup Avannaani qeqertanut qorsuusunut nutaarsiassatsialannik nassartut nuannaanerat sunnerneqanngillat.

Kalaalillu Nunaannit 30-t missaaniittut Atlantikup Avannaani qeqertanut qorsuusunut peqataapput

Air Icelandip aamma Kangerlussuarmiit Keflavikimut ingerlaarfissaq pilersaarutertik avammut nalunaarutigaat

Aappaagu timmisartut ingerlaarfii nutaat

Air Greenlandip ilaatigut nalunaarutigaa ingerlaarfik nutaaq Keflavikimiit Ilulissanut aappaagu ammarneqassasoq aammalu aasakkut Københanvimiit arfinileriarluni kingusinnerusukkut aallartoqartassasoq, taamaalilluni Europamiit nunanit allaneersut ingerlaqqittussat Danmarkimi illoqarfiit pingaarnersaanni unnuisariaqartassanatik. Tassunga ilanngunneqassaaq nutaarsiassaq pingaaruteqartoq ilaasut nunanit allaneersut aatsaat taama amerlatigisut nunatta timmisartortitseqagiiffiani ilaasimasut, pingaartumik tuluit, amerikarmiut tyskillu.

Unammillertup Islandimi timmisartortitseqatigiiffiup Air Icelandip aamma Kangerlussuarmiit Keflavikimut ingerlaarfissaq pilersaarutertik avammut nalunaarutigaat, tamannalu ilaatigut World of Greenland Arctic Circlemit minnerunngitsumillu tikiffimmi pisortamit Ólafur Rafnat Ólafssonimit soorunalumi Visit Greenlandimit nuannaarutigineqaqaaq.

Namminersorlutik Oqartussat pitsaanerusunik attaveqaasiorniarput

Inuussutissarsiornermut Naalakkersuisoq, tassunga ilanngullugu takornariartitsisarnermut, Vittus Qujaukitsoq ingerlatsisut ataatsimiinneranni aamma nalunaaruteqarpoq, nuna tamakkerlugu takornariartitsisarneq pillugu periusissiamik 2016-imiit 2020-mut atuuttussamik nutaamik suliaqarneq Naalakkersuisut aallartinnikuugaat.

Tassani takornariartitsisarnerup siuariartornissaani periarfissat annertuut pitsaanerpaamik tapersernissaat kissaatigineqarpoq. Tamanna inuussutissarsiummut sinaakkutaasumik atugassaritinneqartut pitsanngortinnissaat isiginiarneqarnerisigut pissaaq kiisalu attaveqaatinut pisariaqartunut aningaasaliissuteqarnissap siuarsarnissaata sulissutigineratigut, assersuutigalugu umiarsuit takornariartaatit talittarfiisa pitsanngortinnissaannut aningaasaliinikkut aammalu nunap immikkoortuinit amerlanernut toqqaannartumik pitsaanerusumik amerlerusunillu periarfissiinikkut.

Vittus Qujaukitsoq ingerlatsisut ataatsimiinneranni aamma nalunaaruteqarpoq

Namminersorlutik Oqartussat Ilulissani UNESCO-p Nunarsuarmi Kingornussaani Ilulissat Kangerluani Centerip pilersinnissaa oqalligivaat

Akuersissutit takuniagassallu amerlanerusut

Aamma suliffeqarfinnut takornariartitsisartunut akuersissutit oqallisigineqarput, Vittus Qujaukitsullu oqaatigaa tammajuitsussarsiniartitsilluni piniartitsisarnermut eqalunniartitsisarnermullu akuersissutit aappaagu neqeroorutigineqarnissaat ilimagineqartoq, taakkulu namminersortut tikeraartiminnut pitsaanerusumik periarfissiinissaminnut kajumilersitseqataassasoq aningaasaliinissaannullu pisariaqartumik qulakkeerinnitsitsissasoq taamaalilluni takkununnga Kalaallillu Nunaanni inuiaqatigiinnut annertunerusumik kaaviiaartitsilissasoq.

Maannakkut sammineqartoq alla takornariartitsinermut Naalakkersuisup oqaatigisaa alla tassaavoq Realdaniap, Qaasuitsup Kommuniata aamma Namminersorlutik Oqartussat Ilulissani UNESCO-p Nunarsuarmi Kingornussaani Ilulissat Kangerluani Centerip pilersinnissaa pillugu peqatigiiiniissamik isumaqatigiissut, ilimagineqarporlu taanna 2018-ip ingerlanerani ammarneqassasoq, aammalu takuniagassanut allanut pilersinneqarsinnaasunut maligassiuilluartussatut isigineqartoq.

Pisisartut kinaanersoq ilisimajuk

Visit Greenlandip pisortaata Anders Stenbakkenip suliffeqarfiup takornarissat immikkoortuinik suliaqarnera saqqummiinermini pingaartippaa, tassani Mittarfeqarfiit suleqatigalugit suliffeqarfiillu takornariartitsisartut peqatigalugit Kalaallit Nunaannut tikeraartartut pillugit uppernarsaasiortoqarpoq, assersuutigalugu NATA-mit taperserneqartumik suliniutit, soorlu Tunumi Icelandic Mountain Guides-imik (IMG) ukioq manna siusinnerusukkut suleqateqarneq, taannalu assinik allaaserisanillu pitsaalluinnartunik, aamma Adventure.travel-imi IMG-p nersornaatisissutigisaanik takoqqusaarinermi videomik aamma kinguneqarpoq.

Nunat tamat akornanni ilisimaneqartoq akuerisaasorlu takornariartitsisarnermi takoqqusaarinermi maligassiuisumit digitalinngortitsinermilu immikkut ilisimasalik, Nick Hall, Tuluit Nunaanneersoq suliffeqarfillu Digitial Think Tank VNTM-ip ammarneqarneranit aqaguani taamatupajaaq saqqummiussaqarput, aammalu tikiffiit sorliit internetimi takujuminartumik isumassarsiorfiusartumillu takoqqusaarisarnermi maannakkut siuttuunerannik nuannersumik soqutiginartumillu paasissutissiipput. Ilaatigut Oregon, Wonderful Copenhagenip Norwegianimik suleqateqarnerat kiisalu nunarsuarmi nunat ilisarnaataat ilisimaneqartut tunisassiaminnik sullississutiminnillu alapernaatitsilersut soorlu Volvo aamma AirBnB taavai.

Mittarfeqarfiit suleqatigalugit suiffeqarfiillu takornariartitsisartut peqatigalugit Kalaallit Nunaannut tikeraartartut pillugit uppernarsaasiortoqarpoq

Vestnorden Travel Mart aappaagu Islandimit Reykjavikimi ulluni 4.-6. oktobari ingerlanneqassaaq.

Inuit ulapputeqaat

Savalimmiuni VNTM-imik aaqqissuisup naammagisimaarinninnermik misissuinermi ulluni marlunni saqqummersitsivinni pisisartut tuniniaasartullu akornanni ingerlanneqartumi paasisat suni avammut saqqummiutinngilai. Pisortatiguunngitsumik ilisimatusarnerunngitsumillu ukioq manna ataatsimut isigalugu isummanik nassuiaaneq tassaavoq, takornariartitsinermi ingerlatsisut tamarmik aaqqissuussineq, pisisartut tuniniaasartullu pitsaassusaat iluarisimaarilluaraat aammalu takornariartitsisarneq siuariartortoq, Kalaallit Nunaanniinnaanngitsoq, aammali Atlantikup Avannaani nunani sanilitsinni.

Vestnorden Travel Mart aappaagu Islandimit Reykjavikimi ulluni 4.-6. oktobari ingerlanneqassaaq. Aatsaat 2017-imi Kalaallit Nunaat qaaqqusisuusussaavoq, taamanikkut VNTM-it 32-rissavaat.