Must Win Battles 2012 - 2015

Takornariaqarnerinnarmik suliaqartussatut Visit Greenlandip pilersinneqarnera Kalaallit Nunaanni takornariaqarnermik politikip sammineqarnissaanik sukannernerulernissaanillu pisariaqartitsinermik tunngaveqarpoq.

Kalaallit Nunaanni takornariaqartitsiviit unammilligassaat isornartut/Must Win Battles tallimat ataani allassimapput.

2012-2015 iliuusissani Visit Greenlandip unammilligassai sallinngortissapput, taakku ajunngitsumik aaqqinneqarpata Kalaallit Nunaanni takornariaqarnerup ineriartortinneqarnera aallartissammat.

Unammilligassat ajunngitsumik angusassat naatsumik allattorneqarnissaat, taamaaleriarlunilu aningaasaqarnermut sulisoqarnermullu isumalluutit aaqqiinermi sammineqarnissaat siunertaavoq.

Kalaallit Nunaanni takornariaqartitsiviit unammilligassaat isornartut/Must Win Battles tallimat ataani allassimapput.

Katalogi nuna tamakkerlugu nunallu immikkoortuini takornariartitsinerup ineriartortinnissaanut sakkussatut atorneqassaaq.

Statistiki Nalunaarsuinerlu

Statistiki: Inuiaqatigiit aningaasaqarniarneranut takornariaqarnerup sunniutaa ullutsinni pingaartissinnaanngilarput, taamaalilluta inuussutissarsiutip ineriartornera ataavartumik malinnaaffigisinnaanngilarput. Timmisartunut ilaasut ajornanngitsumik atorsinnaasumillu nalunaarsornissaanut periuseq atorlugu takornarissanut tunngasunik ilumoortunik statistikiliortoqartariaqarpoq.

Nalunaarsuineq: Kalaallit Nunaata pilerisaarinera takornarissat soqutigisaannut sammineruvoq taamaammallu takornarissat immikkoortut assigiinngitsut soqutigisaat nuannarisaallu paasilluassallugit pingaaruteqarpoq. Pisisartut nalunnginnissaat aallaavigalugit pilerisaarineq nittarsaassinerlu assigiinngissitaarlunilu toraagaqarnerusumik ingerlanneqarsinnaavoq misigisassallu nutaat soqutiginartut tuniniarnissaannut ineriartortinnissaannullu iluaqutaasinnaalluni.

Iternga tikillugu nalunaarsuineq pisariaqartinneqarpoq – Kalaallit Nunaannut takornariartartut apersorneqarnerannik oqaloqatiginerannillu tunngavilimmik – immikkoortut nuannarisaat piumasaasalu assigiissusaannik assigiinngissusaannillu takutitsisussamik katalogiliornissamut nalunaarsuineq atorsinnaassaaq. Katalogi nuna tamakkerlugu nunallu immikkoortuini takornariartitsinerup ineriartortinnissaanut sakkussatut atorneqassaaq.

Ersarissuseq

Nunat tamalaat akornanni Kalaallit Nunaat ajunngitsumik ersarinneruleruni takornariaqartitsinerup ineriartortinnissaanut pitsaanerusumik inissisimalissaaq.

Ersarinnerulernissaq anguniarlugu Kalaallit Nunaannut attaveqarfigisinnaasat siammasinnerusariaqarput. Taamaattumik isumalluutit ataatsimoortinnissaat sulissutigineqassaaq, Kalaallit Nunaallu pillugu pitsaasumik imalinnik tunisassiorneq pitsaanerunissaa sulissutigalugu ataatsimoortumik greenland.com-imik aaqqiisoqassaaq, taamaalillunilu takornarissat Kalaallit Nunaanni angalanerminni misigisassaminnik ajornannginnerusumik nassaarsinnaassammata toqqaallutillu.

Kalaallit Nunaat pillugu pitsaasunik imalinnik (allaatigisat, assit filmillu) tunisassiornerup annertusinera, nammineq siaruarteruffimmiinnaq takutinneqassanngillat nittartakkanulli, tusagassiutinut allanullu siaruarteruffinnut allanut ingerlateqqinneqassapput.

Ersarinnerulernissaq anguniarlugu Kalaallit Nunaannut attaveqarfigisinnaasat siammasinnerusariaqarput.

Siunissaq ungasinnerusoq eqqarsaatigalugu Kalaallit Nunaanni mittarfeqarfiit ineriartortinnissaat timmisartoqarnerulernissarlu pisariaqarpoq. 

Atoruminartuuneq

Kalaallit Nunaata nunarsuarmi inissisimanera siammasissusialu nunatsinni takornariaqartisinermut unammillernartuujuaannarsimavoq, tikikkuminaatsuunerlu soorlu angallannermi periarfissat annikinneri, mittarfeqarneq, akitsuusersuineq umiarsuillu tulaffigisinnaasaasa killeqarnerat aamma unammillernartarput.

Siunissaq ungasinnerusoq eqqarsaatigalugu Kalaallit Nunaanni mittarfeqarfiit ineriartortinnissaat timmisartoqarnerulernissarlu pisariaqarpoq. Suliap taassuma ingerlanerani Visit Greenlandip takornariaqartitsinerup soqutigisai paasitisissutigisassavai tusarniaanernilu ataatsimiititalianilu sulinerni aaqqiissutaasinnaasunik siunnersuuteqartassalluni.

Tamatuma saniatigut ukiukkut/upernaakkut takornariaqarnerup annertusinissaa sulissutigineqassaaq, Island aqqutigalugu ataqatigiissitsisumik takornariaqanerup ineriartortinneranik akitsuuteqarnerullu maanna atuuttup nalilersoqqinneranik.

Piumasaqaatit sinaakkutaat

Ataavartumik piumasaqaatit sinaakkutaasa pitsanngorsartarnissaat takornariaqartitsinermik inuussutissarsiornerup ineriartortinnissaanut tunngaviuvoq. Iliuusissanik eqqarsarnermi Kalaallit Nunaanni takornariaqarnermi akuersissuteqalernissaa sammineqarpoq.

Misigisassatut tuniniakkat isertitsilluarsinnaasut sullissinermilli annertuumik piumasaqarfiusut sisamat akuersissuteqalernissaat kisimik pineqarput, sportsfiskeri, trofæjagt, adventure camps heli-skiingilu. Ikittuinnarnit misigineqarsinnaanerat tuniniakkat nalinganut taamaalillunilu tuniniaasup isertitassaanut apeqqutaalluinnarnera taakku sisamat assigiissutigaat.

Akuerissutit pillugit inatsisit aalajangersakkanik allanik immersugassamik piareersaasoqassaaq, akuersissuteqalernissamut periutsimik sukkasuumik erseqqarissumillu pilersitsisoqassaaq, aalajangiisartunut soqutiginnittunullu paasissutissanik agguaasoqassaalluni.

Ataavartumik piumasaqaatit sinaakkutaasa pitsanngorsartarnissaat takornariaqartitsinermik inuussutissarsiornerup ineriartortinnissaanut tunngaviuvoq.

Tuniniaaffinni maanna pioreersuni ineriartortiviusinnaasut salliutinneqassapput. 

Tuniniaaviup ineriartornera

Business to businessimik suliaqarnerup sakkortusarneratigut tuniniaaviup ineriartortinneranut sulineq sakkortusarneqassaaq:

Tuniniaanermik najoqqutassiaq Big Arctic Five, ukiukkut/upernaakkut takornariaqarnermik aaqqissuussisoq, tuniniaaffinni pingaarnerni tuniniaasunut sullissisunullu oqaasiinut nutserneqassaaq, Kalaallit Nunaannut angalanissamut misigisassanut tuniniaanerannut iluaqutigisinnaaniassammassuk.

Tuniniaaffinni maanna pioreersuni ineriartortiviusinnaasut salliutinneqassapput. Tuniniaavinni nutaani B2B-mik sammisat misissueqqissaarnernik tunngaveqassapput, kukkulluni salliutitsisoqannginnissaa pinaveersaatinniarlugu.
Iliuusissanik eqqarsarnermi Islandimi/Kalaallit Nunaanni nunat immikkoortuini ukiumut ataasia B2B workshopertitsisoqartassaaq, kalaallit tuniniaasui islandimiut pisisartui naapittassallugit. Nunat taakku akornanni takornariaqarnermik sulisut suleqatigiinnerunissaat anguniagaavoq.
Iliuusissanik eqqarsarnerup nalaani nunap immikkoortuini takornariaqarnermik akisussaasut ukiumut marloria ataatsimoorlutik workshopertinneqartassapputtaaq, suliat ataatsimoorussat nassuiaasernissaat toqqartornissaallu anginiarlugit.