Kalaallit Nunaanni akuersissutit atulersinneqarneri

Pilersaarusiap aallartiffia: 2010mi ukiup sisamararterutaata sisamaat
Nunatsinni tammajuitsussarsiniarluni piniartitsisartuni aliikkutaralugulu aalisartitsisartuni tusarniaareernerup kingorna – piffinni atorneqarsinnaasuni akuersissuteqalernissaata qanoq soqutigineqartiginera paasiniarlugu – Nunatsinni immikkut soqutigisalinnut takornariartitsinermut akuersissuteqartalernissamut suliaq aallartisarneqarpoq. Tamakkunani suliallit suliaq tapersersorpaat, ikittuinnarnit akissaqarfigineqarnerata aningaasaliissutit qulakkeermagit, pinngortitallu pissarititaanik innarliinani atuisinnaatitsimmat nunallu allaneersunik suleqateqarsinnaanermut aallarnisaasuummat. Inuussutissarsiornermut Naalakkersuisoqarfik suleqatigalugu ullumikkut akuersissutit pillugit piumasaqaatit sinaakkuteqarput, tammajuitsussarsiniarluni piniarneq, misigisassarsiorluni aallaarsimaarnerit, heli-skiingilu taakkununnga ilaallutik (immikkullu aliikkutaralugu aalisarnermut akuersissuteqarluni). Nunami najugaqartut piffinnik atuisinnaanerannik akuersissutit killiliinngillat, takornariartitsivinnut taamaallaat akuersissutit atuullutik.
Pilersaarusiaq VGp paasisitsiniaaneranik suliaanut ilanngulluni 2014imi ukiup sisamararterutaata aappaani sulianngorpoq
Tusarniaanerit soqutigisaqarfinnilu oqalliffiit
Nuna tamakkerlugu takornariaqarnermut siunnersuisutut VG siunnersuutit suliniutillu takornariaqarnerup piumasaqaataanut sinaakkutanut sunniutissaanut tusarniaanernut akissuteqartarpoq. Inuussutissarsiorfiup sinniisuatut VG inuussutissarsiornerup piumasaqaataanut sinaakkutanut pitsaanerulersitsiniarluni oqalliffinni ilaasarpoq.

Nunat immikkoortuini workshopit

Pilersaarusiap aallartiffua: 2011mi ukiup sisamararterutaata pingajuat Visit Greenlandip nunallu immikkoortortaasa suleqatigiinnerat suli nukittorsarniarlugu VG ukiumut marloria nunat immikkoortortaanni takornariartitsivinni sulisut ataatsimoortumik workshopertittarpai, takornariartitsinerup ineriartornera nunalu tamakkerlugu suleqatigiinneq sammineqartarlutik. Workshopit nunat immikkoortuinut oqalliffimmik ataatsimoorfiusumik pilersitsisarput, takornariartitsinerup piumasaqaataasa sinaakkutaat pitsanngorsarniarlugit ataatsimoorluni suliat pilersaarusiallu ingerlareersut nutaallu ataqatigiissarnissaat siunertaasarluni. VGp ukiumut marloria workshopernerni aningaasartuutit isumagisarpai. Pilersaarusiaq VGp suliaani 2012imi ukiup sisamararterutaata siulliani sulianngorpoq

Kalaallit Nunaanni takornalialerisunik ilinniartitsineq

Pilersaarusiap aallartiffia: 2013imi ukiup sisamararterutaata siullia
Kalaallit Nunaanni takornarialerineq inuussutissarsiorfiup ilaani tamani ilinniarsimasunik sulisoqarnissaa unammillernartuujuarpoq. Ukiut tamaasa Nunatsinni serviceøkonomitut naammassisoqartarpoq takornariaqarnermi assigiinngitsutigut ilaasussat. Qaqortumi Niuernermik Ilinniarfik suleqatigalugu VG ilinniartitaanermik suliaqarsimavoq, serviceøkonominik atuagarsornikkut sulinikkullu nunatsinni takornariaqarnerup ineriartorfigisinnaasaanik unammillernartuinillu ilinniarfissamik.
Pilersaarusiaq VGp suliaanut 2014imi ukiup sisamararterutaata siulliani sulianut ilannguppoq.