Kalaallit Nunaannut takornariartartunik qulaajaaneq

Kalaallit Nunaanni takornariaqarneq allanngoriartorpoq. Ukiut arlaqanngitsut ingerlaneranni Island aqqutigalugu timmisartuussisaleq pissutigalugu Kalaallit Nunaat takornarissanit tikikkuminarnerulersimavoq. Taamaammat takornariat tikittartut nutaanngorsimapput, nittarsaassinerpullu tuniniakkagullu taakkununnga pisisartunut nutaanut naleqqunnersut paasiniartariaqalerparput. Takornarissat nutaat kikkuuppat, sunik misigisaqarusuppat misigisassallu tamakkua neqeroorutigereerpagut? Takornarissat angalanerminni misigisassaannik nammineq ujartugaannik misigisaqartissinnaassagutsigit apeqqutit akisariallit.

Visit Greenland 2012-imi aasakkut naqqaniit takornarissat pissusaat angalanernillu toqqaaniarnerminni isiginiartagaat qulaajarniarlugit tunngaviusumik suliaqarluni aallartippoq. Tassa Kalaallit Nunaanni takornariaqarfiusuni tamani, takornarissat nalanni takornariaqannginneruneratalu nalaani, takornarissanik ornillugit apersuinerit. Akissutaat assigiinnersut assigiinnginnersulluunniit aallaavigalugit immikkoortitinneqarput. Inunnik apersuinerit Kalaallit Nunaanni takornariaqarfinni tamani, takornarissat nalaanni takornariaqannginneruneratalu nalaani ingerlajuaannarput.

www.tourismstat.gl pulaaruk, takornariaqarnermiillu naatsorsueqqissaarnernit kisitsisaatit takornariallu periusaat pillugit paasisaqarnerullutit.

Takornariat pissusaasa nassuiarneqarneri paasisaqarfiginerorusukkukkit PDF aaguk; "Nunatsinni takornariat"

Takornarissanik assigiinngitsunut immikkoortiterinermi ukiut, suliffik najugarisarluunniit aallaavigalugit immikkoortiterisoqanngilaq, tassami takornarissat angalaffissaminnik toqqaasarnerat soqutigisaannit pimoorussaqarneranillu aallaaveqartarmat – taamak immikkoortiterineq psykografisk segmenteringimik taaneqartarpoq.

Takornarissat Kalaallit Nunaannut angalaniarnerminni takorluugarisartagaat assigiinngillat. Takornarissat assigiinngitsut Kalaallit Nunaanni misigisassaminnik takorluugaasa assigiinngissusaat paasigaanni toraagaqarnerulluni tuniniaasoqarlunilu pilerisaarisoqarsinnaassaaq aammalu tunisassiat allanngortinneqarsinnaallutik ineriartortinneqarsinnaallutillu.

Tuniniaanermi atugassanik suliaqarneq ajornanngitsuinnaanngilaq (oqaatsinik toqqaaneq, assit, isikkoq), pisisussat angalanermik toqqaaniarlutik takorluugaat assigiinngitsut nalunngikkaanni tamanna ajornannginnerulissaaq. Angalanissaannut suut kajumissaataappat, suut misigerusuttarpaat minnerunngitsumillu qanoq misigerusuttarpaat.

Takornarissanik apersuinermi paasissutissat assigiinngitsorpassuit pissarsiarineqartut, misissoqqissaarneqarput, kajumissutsit pissutsillu assigiinngissutaat assigiissusaallu misissorneqarlutik. Misissueqqissaarneq tamanna immikkoortunut aqqanilinnut – pisisartut Kalaallit Nunaanni takornariaqarfinni angalasimasut assigiinngitsut aqqanillit – agguataarneqarnerannut tunngaviuvoq.

tourismstat.gl-imi takornarissat apersorneqartut soqutigisaat pissusaatalu nassuiarneqarneri sumiissimanerilu procentinngorlugit takuneqarsinnaapput.

Immikkoortut nalunaarsorneranni piginnaasat assigiinngitsut marluk takornarissat assigiinngissusaannik nassuiaataapput:

Takornarissat soqutigisaat, immikkoortut soqutiginerusaat aallaavigalugit immikkoortitinneqarput, soqutigisat tassaallutik Kulturi, Kulturi pinngortitarlu, Pinngortitaq, Soqutigisallu immikkuullarissut.
Takornarissat sunniivigeqatigiinnerat, immikkoortut qanoq soqutigisatik misigerusunneraat aallaavigalugit immikkoortitinneqarput, tassaallutik isiginnaarneq, imminnut sunneeqatigiillutik, imaluunniit ilaavillutik/itisilerineq.